Mizo rimawi ngaihthlakna tur Darbu application chu Zirtawpni zan khan Regency Hotel conference hall-ah an tlangzarh a ni. Darbu hi 'Music & Audio application' niin a thlawna Mizo hla ngaihthlakna a ni a, Mizo zaithiamte album thar hmun danga awm lo lei theihna leh zaithiamte merchandise zawrh chhuah theihna a ni.

App duangtu Darbu team hian mipuite ban phakah Zo rimawi tha kim taka phochhuah a, rimawi a eizawng thinten an thiamna leh thawhrimna phochhuahna tur platform tha zawk an neih theihna tur kawng pakhat a nih beiseiin Darbu hi an siam a. Darbu team-ah hian IT lama mithiam, marketing expert-te leh music lama tawnhriat nei tha tak takte an thawkho.

Darbu CEO Lalrinnunga chuan, "Mizo zaimite leh rimawia eizawngte tan tuna kan kalphung awm sa tibuai si lo hian kawng dang a la awm theih hi kan ring tlat a, chu chu zaninah kan dinchhuahpui. He app hi Mizo mipui te, zaimite leh rimawia eizawngte tana hmasawnna bung thar a nih ngei kan beisei," tiin tlangzarhnaah a sawi. "Platform pakhat ve mai kan ni a, mitin he app-ah hian an leng vek. Midang belh tur nei loa mahnia rimawi tuipui em em, talent nei ṭha site tan pawh kawng hawn kan tum," tiin a sawi belh bawk.

Eng nge a thatna tur?
Darbu app-in a kalpui tur zinga hmasa ber chu Mizo mipuiten Mizo hla kimchang thei ang bera an ngaihthlak theihna tur, hla hlui leh album hluite mumal taka dahkhawm a ni. Eizawnna atana hmangten hlawkna tha zawk an hmuh theih phahna tura duan niin, Mizo rimawi khawvelah hmasawnna a nih ngei beiseia duan a ni - eizawnna tlak thiamna nei, kal ngaihna hre silo te tan zau takin kawng a inhawng e. 

Darbu hi music & audio application niin, a thlawna rimawi ngaihthlak theihna a ni. He app-ah hian Mizo hla chi hrang hrang a awm dawn a, tunah hian hla eng emaw zat chu dah luh tawh a ni nghe nghe. Zaimite tan a hlu zual dawn a, an hlate chu local cable TV leh YouTube lamahte a thlawna pe chhuak ngawt tawh loin man chawia ngaihthlak theih turin an dah thei tawh dawn a ni. He tianga zaimite tana platform changtlung tak mai a awm ta hi chanchin lawmawm tak a ni. 

A feature...
Internet khawvela sumdawnna kalphung pakhat chu freemium hi a ni a, YouTube, Spotify leh app dangte pawhin an hmang - ngaithlatu leh entu an tam dan a zirin sum lakluh theihna a ni. Darbu app hi ‘piracy’ phalna lova lo tihdarh leh thildang laka a him nan ‘encryption’ uluk tak a kalpui niin, app atang hian eng hla mah a lakchhuah theih loh.

Darbu-ah hian thil hlawm lian tak pathum - library, exclusive release leh store te a awm. Darbu library hi ‘streaming platform’ niin, Mizoten kan hriatlar - Spotify leh YouTube Music te ang tho niin hetah hian Mizo hla tam thei ang ber mipui tan a thlawn a ngaihthlak theihin a awm dawn. Hla thar bakah hla hlui tam thei ang ber ri tha zawka ngaihthlak theih tura ‘remaster’ hnuah dah a ni a. Heng hlate hi phalna nei a dah thlap an ni bawk.

Darbu Exclusive Release-ah hian zaimiten album thar an release a nih chuan Darbu App-ah hian an zuar ang a, he app-ah hian a lei theih ang. Darbu a release hla hmundangah ngaihthlak tur a awm dawn lova, copy chhawn theih a ni dawn lo bawk. Hei vang hian album siamtu hnenah hlawkna a kal dawn a, hralhna atanga sum lut hi artist ten 90% an chang ang a, Darbu-in 10% an chang ve bawk ang.

Darbu Store-ah hian artist ten an kutchhuak emaw bungrua eng ang chi pawh Darbu App katlangin an zuar thei. An mahniin merchandise nei tura hma an la thei lo a nih pawhin an duhdan anga design puiin, artist-te tana hlawk tur si, a hranpa a an buaipui ngai si loin Darbu hian a zawrhsak dawn bawk a ni. International shipping partner an neih bawk avangin khawi hmun atang pawhin a lei theih dawn.

Darbu app hi App Store leh Google Play-ah te iOS leh Android hmangte tan download turin a awm ve ve tawh. Tun dinhmunah artist 264 atangin Mizo hla 1280 chuang a awm mek a, nitin hla hi dah belh zel a ni.