ZALEN Jan 14. 2025; Viksit Bharat Young Leaders Dialogue 2025, January 10–12, 2025 chhunga Bharat Mandapam, New Delhi-a neihah Grace Lalrinpari Hauzel, Pachhunga University College history department-a fourth-semester zirlai chu Youth Representative of India atana thlan zingah telin PM Minister Narendra Modi hmaa thusawi zingah a tel.

Ṭhalai, ram hruaitu ni thei tura beiseiawmte inkhawmpui Viksit Bharat Young Leaders Dialogue 2025-a telte hi Viksit Bharat Young Leaders Dialogue, National Youth Festival 2025 bul tanna atan hian MYBharat Portal-ah inziak lûtin thalai mi nuai 30 chuangte chuan November-2024 khan Online-in Quiz an chhang a. Heta titha zual thlan mi nuai 3 te chu thupui hrang hrang 10 atanga an duh ber hmangin essay ziahtir leh an ni a. Essay endik hna hi a ziaktute State/UT-a Sports & Youth Services Department kutah dah a ni.

Mizoram bikah chuan Sports&Youth Services Department leh Higher & Technical Department-te thawk hoin, H&TE Dept-a expert ten Mizoram atanga essay lutte an en dik a. Thupui tina, essay ziak thate chuan December 23, 2024 khan Power Point Presentation, hmangin intihsiakna (State Championship) an nei leh a. He intihsiaknaa tel zawng zawngte hi Ministry of Youth Affairs &Sports, Govt of India tirh Third Party Moderator-chuan personality assessment a neihpui leh vek hnuah, Power Point Presentation leh Personality Assessment lâk kawpa tithate chu National Level Competition-a tel tura thlan an ni ta a ni.

Mizoram atangin mi 12 thlan chhuah an ni a. Heng thalai rual thlan chhuahte hian January 10-12 2025 chhûnga Viksit Bharat Youth Festival 2025, New Delhi-a neih zawh takah khan, Power Point Presentation hmangin, ram inrelbawlna leh hmasawnna atâna an ngaihdan leh hriat thilte sawi chhuahna hun an nei a.Heng presentation a ti, tha mipa pakhat leh hmeichhia pakhat theuh chu thupui tin atang hian thlan chhuah leh niin, chungte chuan Prime Minister Narendra Modi hma ah ram hmasawnna tur an veizawng te, an thupui theuh hmangin an present leh a ni.

Viksit Bharat Challenge a tel a presentation nei tur hian India ram pum atangin mi 3000 thlan chhuah an ni a. Mizoram atangin mi 12 leh Official Escort 2, Dr H. Lalzuithangi Associate Professor, Govt. Hrangbana College leh Dr. Rosaline Varsangzuali, Associate Professor, Govt Hrangbana College te chu an kal a ni.

Mizoram team atangin Grace Lalrinpari Hauzel leh Yerrabelli Dedeepiya, Reddy te chu Shortlist zingah telin, a tawpah erawh Grace Lalrinpari Hauzel, chauh hian Prime Minister hmaah presentation pêk theihna remchang a nei ta a ni.

Final presenter-te hi January 12, 2025 khan Prime Minister chuan Chawchhun a ei pui a, Grace Lalrinpari Hauzel hi Prime Minister bulah thuttir a ni.

Viksit Bharat Young Leaders Dialogue hi Vision 2047 a tel niin Prime Minister Narendra Modi-a'n nikum India Independence Day-a a sawi - ṭhalai political party-a telna nei lo mi nuai khatte politics-a hman ṭangkai a, developed India (Viksit India) atana an ngaihdan te an thawh ve theihna tur remchang siamsak a tih nena inzula ruahman a ni.