Mizo silai kap thiam rualten an tum hlen zo lo mah se hlawhtlinna ropui tak an chang a, India hmarchhak pum silai inkahsiakah medal 40 lain ram pum huap intihsiaknaa tel thei mi pasarih nen an haw.

Meghalaya khawpui, Shillong-a kar kal ta Thawhtanni leh Pathianni inkara 10th North East Zone Shooting Championship Rifle & Pistol-ah Mizo silai kap thiamte hian gold medal 18, silver 10 leh bronze 12 lain a pum puiah pahnihna an ni a, Assam an phak lo.

Tun tum inelnaah hian Mizoram Rifle Association (MRA) chuan silai kap thiam 40 a tir a. Nikumah pahnihna an ni a, kuminah hian a aia chet thata champion ngei an inbeisei a. An kal hmain team manager Lallianmawia chuan, “Kan practice apiangin ni tin national championship-a kal phak tura point hmuh ngai zat hmu pha hi a zahve aia tam mah kan awm ziah a ni,” tiin champion an tum hle tih a lo sawi tawh a; mahse, Assam an phak ta lo a ni.

Mizoram team hian an tum hlen zo ta lo mah se an zinga mi pasarih chuan kumin kumtawpa National Shooting Championship Competitions (NSCC)-a tel thei turin an inkap tling ta tho a ni.

NSCC-a tel turte hi Narayan Thapa (50m Free Pistol - Masters), Lalhmangaihtluanga (50m Free Pistol - Men Individual), Lalramthara (10m Air Pistol - Men Individual), Erast Lalhruaimawia (10m Air Rifle - MQS), Cindy B. Lalchansangi (10m Air Rifle - Sub-Youth), Malsawmsangi (10m Air Rifle - Sub-Youth) leh Eric Vanlalhriatsanga (10m Air Rifle - Youth Men Individual) te an ni.

Mizoram shooter tha pasarihte hi November 20 atanga December 12 chhunga 66th NSCC-ah an inlan thei dawn tihna a ni a. He intihsiakna neihna hmun tur hi National Rifle Association of India (NRAI) chuan a la puang leh ang.

Hmarchhaka inelnaah hian Mizo silai kap thiam zingah Saihmingthanga Sailo chu mi mala che tha ber niin gold medal pali a la a. 50m Peep Sight Rifle (Masters), 50m Peep Sight Rifle (Men Individual), 50m Open Sight Rifle (Masters) leh 50m Open Sight Rifle (Men Individual)-ah te India hmarchhak puma kap thiam ber nihna a hauh.

Narayan Thapa chuan gold medal pathum a hawn bawk a. 10m Air Pistol (Senior Masters), 25m STD Pistol (Senior Masters) leh 50m Free Pistol (Senior Masters)-ah te el phak an awm lo.

Lalhmangaihtluanga leh Lalramdinpuii te pawhin gold medal pahnih ve ve an kap chhuak a. Hmangaihtluanga hian 50m Free Pistol (Men Individual) leh 25m STD Pistol (MQS)-ah thiam ber nihna hauhvin 25m Centre Fire Pistol (Men Individual)-ah silver medal a la bawk a. Ramdinpuii hian 50m Open Sight Rifle (Junior Women) leh 50m Peep Sight Rifle (Junior Women)-ah gold medal a lak bakah 25m Sport Pistol (Junior Women)-ah silver medal a kap chhuak bawk.

Mizoram aiawha feh chhuakte hi an vaiin mi 41 niin coach, manager leh assistant manager an tel a. Manager leh a assistant pawh hi inelnaah an inlan tho va. Category pariatah inelna neih niin huang tinah hian kum bithliah thliar leh a ni bawk.

Mizoram tihmingthatu silai kap thiamte hian Thawhlehni hian Shiilong chhuahsanin an haw ang.

MIZORAM TAN MEDAL LATUTE:
Narayan Thapa:
10m Air Pistol (Senior Masters) - GOLD
25m STD Pistol (Senior Masters) - GOLD
50m Free Pistol (Senior Masters) - GOLD (66th NSCC qualify)

Hmingthantluanga:
25m STD Pistol (Senior Masters) - SILVER

Saihmingthanga Sailo:
50m Peep Sight Rifle (Masters) - GOLD
50m Peep Sight Rifle (Men Individual) - GOLD
50m Open Sight Rifle (Masters) - GOLD
50m Open Sight Rifle (Men Individual) - GOLD

Lallianmawia:
50m Free Pistol (Masters) - GOLD
50m Peep Sight Rifle (Masters) - SILVER

David Vanlalhruaia:
50m Open Sight Rifle (Men Individual) - SILVER
50m Open Sight Rifle (Masters) - SILVER
25m STD Pistol (Masters) - BRONZE

E. VL. Hmachhuana:
50m Open Sight Rifle (Masters) - BRONZE
25m STD Pistol (Masters) - GOLD

Lalhmangaihtluanga:
50m Free Pistol (Men Individual) - GOLD (66th NSCC qualify)
25m STD Pistol (MQS) - GOLD
25m Centre Fire Pistol (Men Individual) - SILVER

Lalramthara:
10m Air Pistol (Men Individual) - GOLD (66th NSCC qualify)

PC. Lalrinfela:
25m Centre Fire Pistol (Men Individual) - BRONZE
10m Air Pistol (Mix team) - BRONZE

Erast Lalhruaimawia:
10m Air Rifle (MQS) - GOLD (66th NSCC qualify)
50m Peep Sight Rifle (Men Individual) - BRONZE
10m Air Rifle (Mix team) - BRONZE

Zoliansanga:
50m Peep Sight Rifle (Men Individual) - SILVER

John Laldinpuia:
50m Open Sight Rifle (Men Individual) - BRONZE

Cindy Vanlalhriatpuii:
50m Open Sight Rifle (Women Individual) - GOLD

Vanlalhruaii Ralte:
50m Peep Sight Rifle (Women Individual) - BRONZE

Lalhlimpuii:
50m Open Sight Rifle (Women Individual) - SILVER
10m Air Pistol (Mix team) - BRONZE

Lallawmzuali Zadeng:
50m Open Sight Rifle (Women Individual) - BRONZE

Lalthazuali:
25m Sport Pistol (Junior Women) - GOLD
50m Open Sight Rifle (Junior Women) - SILVER
50m Peep Sight Rifle (Junior Women) - SILVER

Lalramdinpuii:
25m Sport Pistol (Junior Women) - SILVER
50m Open Sight Rifle (Junior Women) - GOLD
50m Peep Sight Rifle (Junior Women) - GOLD

Cindy B. Lalchansangi:
10m Air Rifle (Sub-Youth) - GOLD (66th NSCC qualify)

Malsawmsangi:
10m Air Rifle (Sub-Youth) - BRONZE (66th NSCC qualify)

R. Lalremtluangi:
10m Air Rifle (Mix Team) - BRONZE