Aizawl August 21, 2023: Vawiin khan ZPM chuan party office-ah chhung inkhawm hun kan hmang a, Leader Lalduhoma, MLA chuan, an sawrkar chuan thlai pali lei nghal tum an neih thu a sawi a, Kuhva, Pahnah leh Buh hum mana sum luangkhhuak te Mizopa Ipte-ah a tam thei ang ber an luhtir dawn niin a sawi.

Lalduhoma chuan, “Pathian leh mipui zarah kan sawrkar chuan leiba tam tak kan chhawm dawn a, chuti chung chung chuan kan sum neih ang angin a kum khatnaah thlai thar pali (4) kan lei dawn a, a rate tur pawh kan puang fel vek tawh. Chumi atana support price ngai zat tur pawh kan mithiamten an chhutchhuak tawh a, heng thlai pali bakah hian Mizoten kan tharchhuah ve reng, a sawngbawlna kan neih loh vanga sum tam tak kalral thinna - Kuhva, Panhnah leh Buh hum a sum luangchhuak zawng zawngte Mizo ipteah a tam thei ang ber kan luhtir dawn a ni,” a ti. 

Duhoma chuan Kuhva-ah sum a luangral hnem hle tih a sawi a, kum khata vaiin nuai 6600 zet an rut thun niin a sawi a, an sawrkar chuan hand holding hmangin theihtawp an chhuah ang a, sum tam tak an hum thei dawn a ti. Kuhva hi ei tura siam bakah rawng siam nan an hmang a, heng lai hnaivai vaiho thlawhkhumin a company tak takte nen indawrin tangkai leh hlu leh zuala siam dan an zawng dawn a ti.

ZPM Leader chuan Panhnah kum khatah cheng vaibelchhe 17 man vel eiral niin a sawi a, sawrkar chakna nena beih chuan a hlawhtlling thei ngei ang, a ti. Eng pawl pawh ni se, mi tumruh leh taima tan kawng a inhawng dawn a, a dingchhuak tur ngei an puih tur thu a sawi. 

Economic Survey 2022-23-a a landanin kum khata Mizoram buh tharchhuah zat chu matric tonne 62,182 a ni a ti a, tlangram lo neih leh leilet atangin kumtin mamawh zaa 34 vel chauh tharchhuak a ni, a ti bawk.

Duhoma chuan, "Buhfaia tharchhuahte hian kan mamawh engemawchen phuhru thei tura tan lak a ngai a, vai iptea sum lut tam tak hi Mizopa ipteah a lut dawn a ni. Sawrkarin leiba a ngah avangin heng kan sawi zawng zawng hi a kum khatnaah beihpui kan thlak nghal thei lo mai thei. Mahse kan ngaih pawimawh ber a nih avangin thapui thawhin hma kan la zui nghal dawn a ni,” a ti bawk.