Aizawl January 16, 2024 – Cheng nuai 4915.35 senga sak tura ruahman District Court Complex, Vengsang Champhai lungphum an phum naah Justice Michael Zothankhuma chuan Mizoram-ah case 6113 a awm mek tih a sawi a, a zahve vel chu dan bawhchhianna lian tham a nih thu a sawi.

Justice Michael Zothankhuma, Judge, Gauhati High Court chuan November 2021 a Champhai Judicial District din anih hnuah hmalakna hrang hrang leh hmasawnna tam tak awm chho zelin District Court Complex changtlung tak ruahman tur a ni ta chu lawmawm a tih thu a sawi. District Court Complex, Vengsang chu tha taka ruahman anih ngei theihnan a sak hna chu High Court in uluk taka a vil tur thu leh, khawtlang mipuite, NGO-te leh media mi te pawhin neitu rilru thinlung pu a, uluk taka lo vil pui thin turin a chah a.

Gauhati High Court Judge chuan Mizorama dan bawhchhiatna hrang hrang awm mek dinhmunte pawh tarlangin Mizorama case 6113 awm mekah a zahve vel (3032) chu Dan bawhchhiatna lian tham Criminal Case an nih thu a tarlang a. Champhai District a case awm mek chu 482 niin, hengte zinga case 367 (76.14%) te chu Criminal Case an tih thu a sawi a. Champhai District ah Criminal case a pung chak em em chu veiawm a tih thu sawiin, Sawrkar official-te, Dan leh thupek kengkawhtute, tlawmngai pawlte leh mipuite chu Dan bawhchhiatna do kawngah theihtawp chhuah tlan a tul takzet a ni, tiin hmalak puiah a sawm a ni.