Season khat chhunga Mizoram chhung Badminton inelna ngaihhlut ber, Mazuala Memorial MBA Official Championship 2022, senior Khawzawl Vengthar YMA Hall-ah khelh chu ni 12 August khan zawh fel niin mipaah Saitluangpuia champion-in hmeichhe lamah Abigail Lalthazuali a champion thung. 

Khawzawl District Badminton Association buatsaih tournament hlawhtling takah hian men’s singles leh Men’s doubles category-ah champion thar Mizoramin a nei a, phai lam badminton academy-a awm te hun a inherchhuak chhuak chho tan dawn te pawh a ni maithei. 

Saitluangpuia hun a in herchhuak ta!
 Ramhlun Venglai tlangval Saitluangpuia hi kum 13 mi chauh a nihin Mizo naupang zinga a hmasa ber turin Pullela Gopichand Badminton Academy, Hyderabad-a coaching kal turin a chhuk a, taima leh rim taka zu zirin hlawhtlinna ropui tak a rawn chang thei ta a ni. 

PGBA a luh ma hian Saitluangpuia hian Mizo coach tha Zosiama te, Chhuantea te leh Muanawma te hnuaiah badminton a zir thin a, PGBA a luh thlak hnu hian national level tournament thahnem tak a hmachhawn tawh. 

Tun tournament-ah hian men’s singles-ah seeded number 7 niin  Bawngkawn Badminton Club (BBC) tan a khel a, harsatna nei lo in semi-final a thleng. Semi-final ah Malsawmsanga, Bawngkawn Badminton Club hmachhawnin deciding-ah a chak hram. Final-ah PGBA a coaching kallai tho, Joseph VL Ringngheta hmachhawn lehin deciding game-ah 21-9, 18-21, 21-12 a hnehna changin a champion. 

Saitluangpuia hi kum 16 leh thla 11 a upa a niin, Mizo shuttler zingah MBA senior official leh senior ranking tournament dang zawng zawng a Men’s singles champion thei naupang ber record thar a rawn siam a. Ranking chhuak hnuhnung berah Men’s singles-ah India number 19 a ni mek bawk. 

PGBA lama an coach Eddie Lalfelkima chuan Tluangpuia chungchang sawiin, “Decipline a nei tha a, a nungchang a mawi a, Indian coach dangte paw’n a lakah beiseina an nei sangin, hriselna tha nei a training a kal chhunzawm zel theih chuan Mizo players, India level a beiseiawm ber leh hmabak nei eng ber a ni” a ti.

Hmeichhe lamah Abigail-i bawk!
Women’s singles inelna lamah season hmasa a MBA Official Tournament-a Mizoram champion thei naupang ber record siam tawhtu Abigail Lalthazuali, Saron Veng, chu a champion nawn a, tunah hian kum 16 leh thla 10 a upa chiah a la ni. Abi-i pawh hi  Zosiama, Chhuantea leh Muanawma te hnuai atanga zir chhuak niin tunah hian National Junior Head Coach, Sanjay Mishra hnuaiah ITM University Badminton Academy-ah coaching a kal mek.

Final match-ah hian Mizoram player beiseiawm ber pawl leh ITM lama academy lama a awmpui, kum 14 lek a upa Lalrempuii, Serchhip nen in hmachhawnin straight set in hnehna a chang. Anni pahnih hian final thleng thei turin Mizoram a players tha ber berte an hneh a ni. Anni pahnih hi senior level-ah kum chawhrual a final thleng thei Mizoram in a hmuh naupan ber te an la ni nghe nghe.

Category pathum a final lut thei Jojo    
Joseph VL Ringngheta, Kulikawn veng, Ralte Villa Badminton Club tana khel mek hian Official Tournament-ah kum 2020 khan U-19 player ni chungin Junior leh Senior Category-a champion kawp thei nihna a lo hauh tawh a. 

Tun tum tournament ah pawh Men’s singles, Men’s doubles leh Mixed doubles-ah te final a lut vek a ni. Men’s singles-ah a vanduai a, mixed doubles ah pawh a partner Lalrinhlui, Ralte Villa BC nen chak zo lo mah se, Men’s doubles lamah erawh anmahni el pha an awm meuh lo. Kum 19 lek a la ni a, a partner Lalramzauva, Durtlang pawh kum 17 mi lek a la ni bawk. Heti chung hian tun tournament a seeded no 1 leh champion tura rinkai ber Lalrinawma leh Laldintluanga Tlau, Bawngkawn BC te chu straight set in an hnen a, Mizoram Badminton Men’s doubles inelna huangah a vawikhat nan an champion.

Tournament result:
Men’s Singles:
Champion : Saitluangpuia, Bawngkawn BC
RunnersUp: Joseph VL Ringngheta, Ralte Villa BC
Women’s Singles: 
Champion: Abigail Lalthazuali, Saron BC
RunnersUp : Lalrempuii, Ralte Villa BC
Men’s doubles:
Champion: Joseph VL Ringngheta & Lalramzauva, Ralte Villa BC
Runners Up: Lalrinawma & Laldintluanga Tlau, Bawngkawn BC
Women’s doubles:
Champion: Lalrinhluii & Zothansangi, Ralte Villa BC
RunnersUp: Laldingpuii, MVBA & Lalrempuii, Ralte Villa BC
Mixed Doubles:
Champion: Joseph M. Lalrinawma & F. Vanlalhriatpuii, Ralte Villa BCRunners Up: Joseph VL Ringngheta & Lalrinhlui, Ralte Villa BC35+

Men’s Doubles:
Champion: Joseph M. Lalrinawma & Zarzokima, Ralte Villa BC
Runners Up : Christopher & Jerry Zodinthara40+ 
Women’s Doubles:
Champion: Jenet Laltlankimi & Lalhminghluii
Runners Up: C. Laltanpuii & Ponty Lalramtluangi

45+ Men’s Doubles:
Champion: H. Vanlalhruaia & R. LaltlankhumaRunners Up: H. Zahmingliana & Zazokima
50+ Men’s Doubles:
Champion: Lalthansanga & RosanglianaRunners Up: C. Vanlalkunga & H. Vanlalhruaia