ZALEN July 23, 2023 : Agriculture Mi thiamte chuan Mizoram hian a tlem berah kum khat chhungin buhfai metric ton 1,80,000 vel a mamawh niin an hria a. Kum khatah metric ton 60,000 chuang hret Mizoram-in a tharchhuak nia ngaih niin a bak zawng hi chu phai atanga lak luh a ni. Kuminah buh thar a pung a, Champhai-in an thar hnem ber.

Agriculture department chhut danin kum 2019-20-a Mizoram buh thar zawng zawng chu metric ton 60,239 a ni a, heng zinga mt 22,904 hi tlangram lo neih atanga thar niin a bak zawng hi leilet atanga thar a ni.

Kum 2020-21-a Mizoram buh thar zat chu mt 62,182 nia chhut a ni a, hei hi kum hmasa lam aiin MT 1,943-in a tam a, district hrang hrang zingah Champhai chu buh thar tam ber an ni.

Mi thiamte chhut danin Mizoramah leilet siam theih ram zawl hectare 77,466 (0.25%) a awm a, chung zinga hectare 16,166 chauh 2020-21 thleng khan hman tangkai a la ni.

Mizorama buh thar chhuak hnem ber, Champhai district-ah chuan ruahtui tlak har vangin chhungkaw eng emaw zat chuan kumin hian leilet an siam thei lo nia thudawn a ni a. Zalen-in Champhaia agriculture department thawktute a biaknaah Champhai zawl bikah chuan tui awm loh vanga harsatna nei awm lem lo mah se tlangram leilet neite erawh chuan harsatna an tawk tih an sawi.

“Kum dang aiin ruahtui kan hmu tlai a; mahse, Champhai leiletah erawh buh kan phun thei a. Hmun dang pawh hi an phun lo vang tih a la sawi theih loh a, a then chuan August thlaahte an phun thin a, a la tlai loah kan ngai a ni,” an ti.

Champhai agriculture department thawkte chuan tlema tlangram deuha leilet neite chuan tui an neih that loh avangin vaimim ching turin thurawn an pe tih an sawi a. Hetianga tui nei tha lo hi Champhai leileta hmun thenkhat leh Lianpui khuaah an awm niin an sawi bawk.

Hnahlan Tiau kama leilet neite pawhin kum dang aia ruahtui an hmuh har avangin chhungkaw thenkhat chuan leilet hi an siam lo niin an sawi a. Mahse, hetih lai hian a tam ber erawh chuan buh an phun thei niin an sawi.

North Vanlaiphaiah pawh a tlangpui chuan lo neituten buh an phun thei tih ZALEN an hrilh a. “Dum hmunah chuan tluang takin buh kan phun thei a; mahse, tlema khawmual lam deuhah erawh duh anga ruahtui kan hmuh that loh avangin harsatna kan tawk a. Kum dangah chuan June thla velah hian buh kan phun deuh ber a; mahse, kuminah erawh July thlaah kan phun tlangpui a ni,” tiin N.Vanlaiphaia lo neitu pakhat chuan ZALEN a hrilh bawk.