ZALEN, November 24, 2025: Arunachal Pradesh-a ram pum huap inelnaa Mizoram a champion-pui hnuah Durtlang rawlthar, C. Lalramsanga chuan mi mal inelnaah Mizoram tihmingtha zuiin boys’ doubles-ah a champion a, mixed doubles-ah pathumna a ni leh bawk.

Ramsanga hian Thawhlehni kal ta atanga khelh tan, Itanagar-a Yonex-Sunrise 48th Inter State - Inter Zonal & National Junior Badminton Championship 2025-ah hian Ramsanga hian team inelnaah Mizoram boy’s team chu a vawi khat nan gold medal a lakpui a, hei hi ram pum huapa Mizoram shuttler-ten champion nomawi an lak hmasak ber a ni nghe nghe.

Mi mal inelna khelh zuiah a kawppui, Sumith A.R nen boys’ doubles-ah an champion zui a. Champion nomawi a kawl mek, mixed doubles-ah erawh Taarini Suri nen tangdunin a nomawi a hum zo lo va, pathumna a ni thung.

Boys’ doubles-ah hian Karnataka lam mi, Sumith nen hian Seeded No. 3 niin round of 32-ah Mizoram pair, Sainunmawia Sailo leh Malsawmhlua te chu 21-16, 21-19-in an hneh a. Round of 16-ah Manipur atanga tel, Malemnganba Singh Heman leh Amarjit Singh Khwairakpam te tangdun chu 21-17, 21-18-a hneh zuiin quarterfinal an lut.

Semifinal luh inchuhnaah Seeded No. 8 Aman Aneesh leh Yudhajit Reddy Padigepati inkawp lakah game hmasa ber hloh mah se 17-21, 22-20, 21-16-in an lehthal a, a thiam pali zingah an tel a. Semifinal-ah Seeded No. 2 vaw thlatu, Charan Ram Thippana leh Hari Krishna Veeram Reddy te tangdun lakah 3-1 (21-13, 18-21, 21-11)-in hnehna an chang zui a, final an lut.

Thawhtannia final khelhah harsatna nei lovin Bhargav Ram Aggirella leh Viswa Tej Gobburu te inkawp chu 21-13, 21-12-a hnehin India champion an ni ta a ni.

Ramsanga hi nikum khan Vishakha Toppo nen inkawpin mixed doubles-ah an lo champion tawh a, kuminah hian huang dangah a champion leh ta a. Hetih lai hian a nomawi kawl lai erawh a hum zo ta lo thung.

Mixed doubles-ah hian Maharashtra tleirawl, Taarini Suri nen tangdunin champion tura beiseiawm ber zinga mi ni mah se semi final-ah Vansh Dev leh Angel Punera te tangdun lakah 21-19, 21-10-in an tlawm a, pathumnaah an lungawi a ngai ta a ni.

Suri-i nen hian BWF Super 300 tournament, Syed Modi India International 2025 khel turin Lucknow, Uttar Pradesh an pan lehnghal nghe nghe.

Ramsanga hi India player beiseiawm ber zinga mi a ni mek a, hetiang player tha leh theihna nei sang an nei hi Mizoram Badminton Association (MBA) chuan ropui a tiin an chhuang tak zet tih an sawi a. Sang zawk thleng zel tur leh Mizoram leh India tihmingthatu ni zel turin duhsakna an hlan tih an sawi.