August 9, 2024-a Chief Minister Lalduhoma hova Council of Ministers thukhawm chuan General Administration Department (GAD) atanga lut agenda, ‘Mizoram chhim lamah greenfield airport siam ni se’ tiin a rel a. Airport ti mai lova greenfield airport tih lai tak hi mipuiten an hrethiam lovin thil thar niin an ngai.

Greenfield airport hi thil danglam vak ni lovin airport la siam ngai lohna hmuna thlawhna tum hmun thar siam a ni mai a. Tlang emaw, hmun zawl remchang emaw kha airport atan an siam a, a thar (virgin land/soil) hlaka thlawhna tum hmun siam hi greenfield airport tih a ni.

Hetih lai hian greenfield airport nena inang tak pakhat a awm a, chu chu ‘brownfield airport’ an ti leh a. Hei hi chu tun hmaa thlawhna tum hmun lo awm tawh sa chei thar leh a ni thung.

Tuirial Airfield hi tun hma deuh chuan thlawhna tê chi tum theiha siam a ni thin a; mahse, hun eng emaw chen thlawhna a tum tawh lo va, helai hmun hi thlawhna tum theihna atan chei thar leh ni ta se, chu chu brownfield airport tihna a ni dawn a ni.

ZALEN-in Aviation thawktute hnen atanga thu a dawn danin Mizoram chhim lama airport siamna atan hian hmun eng emaw zat enfiah a ni tawh a. Chung zinga thenkhatah chuan airport lian vak lo siam theih a nih beiseiin sawrkar laipuiah pawh a siamna tur sum dil a ni tawh a; mahse, sawrkar laipui hian sum a pe chhuak lo niin an sawi.

Tun dinhmunah Lengpui Airport chu Mizoram mipuite mamawh a phuhru tawk tho lawm ni tia ZALEN zawhna chhangin aviation thawktute chuan, “Tun dinhmunah chuan chhim lama airport siam hi kan la mamawh lutuk lo a ni mai thei a; mahse, nakin hun lo la kal zel tur ngaihtuahin tun atanga ruahmanna lo siam leh inbuatsaih lawk a ngai a. Tunah hian airport siam hi remti ngawt mah se a siamna tur sum hi la zawn leh chauh tur a ni a, tun dinhmuna hmalak nghal vut vut theih a ni lo a ni,” an ti.

Sawrkar kal tawh, Congress leh MNF kaihhruai sawrkar khan chhim lama airport siamna atan hian Lunglei leh a chhevela hmun hrang hrang - Kawmzawl, Thlisam, Vuakmual, Vaisam leh hmun dangte an lo thlithlai tawh nia thudawn a ni.

Hetih lai hian pa pakhat chuan chhim lama airport siam chu tul a tih lem loh thu Zalen a hrilh thung a. “Tuna kan neih sa, Lengpui Airport pawh a senso a hautak kan tih vangin mi dang kuta hlan kan tum ruai a ni a. Heti chunga Mizoram sawrkar senso tura airport dang siam lo tum leh hi a hun lo hlein ka hria,” a ti.

Chhinchhiah danin India rama thlawhna tum hmun (civil aviation airport) hmasa ber chu Juhu Aerodrome (ICAO: VAJJ) niin Mumbai (Bombay) khaw dai, Maharashtra state a awm a ni a. He airport hi kum 1928 khan siam a ni a. Mi mal enkawl (private) greenfield airport hmasa ber chu Kazi Nazrul Islam Airport, Durgapur, West Bengal a ni thung.