Aizawl: Mizoram chhunga innei thar inziak lut zingah Kristian dana innei an tam lawr hle.

Registrar of Marriages in an chhinchhiah danin April 2008 atanga March 2019 inkar chhung khan Mizoram pumah innei inziak lut 27,596 an awm a, heng zinga 26,032 chu Kristian dana innei an ni a. Kristian dana innei hi innei zawng zawng atanga chhutin 94.33% a tling a ni. Kristian dawtah hian Buddhist dana innei chu tam berin 1447 an awm a, Hindu 113, Muslim 1 leh a dang 3 an awm bawk. Nikum April atanga March, 2019 chhung bik khan innei inziak lut hi Kristian 2739, Hindu 11, Buddhist 483 leh a dang 1 an awm a, nikum chhunga inziaklut hi 3234 an ni.

Registrar of Marriages thawktute chuan innei thar inziahluh chu tih ngei ngei tul anih avangin innei thar ten an ngai pawimawh hle tih Zalen an hrilh a. Hetih lai hian thingtlang hmun thenkhatah erawh chuan a pawimawhzia hre lem loa ngai pawimawh lo deuh an awm niin an sawi bawk.