Aizawl January 8, 2024: Vawiin tlai khan Nagaland Deputy Chief Minister Y. Patton chuan Chief Minister Lalduhoma chu a chenna Bungalow ah a tlawh a, Nagaland pawhin Mizoram ang bawkin India-in Myanmar ramri hung a tum an thlawp loh thu an sawi dun.

Nagaland Deputy Chief Minister hian, Mizoramah sawrkar thar siam anih avanga a lawmpui thu a hrilh a, Naga te leh Mizote te chu thlahtute atanga unau inhnai tak an niin a lang a ti a, chuvang chuan an tan pawh Chief Minister i nih thu a hrilh. Lengpui a thlen atanga Aizawl khawpui chhung a kal tawhna chinah Mizoram mipuiten a kaihhruai sawrkar an thlawp tha hle-a a hriat thu leh an hlim hle nia a hmuh thu a hrilh bawk.

Myanmar nena an inrina (border) chungchang sawiin Y. Patton chuan, "Myanmar leh India ramri hung hi keini Naga mipuite tan pawh thil pawm theih loh a ni. Naga mipui zatve deuh thaw hi Myanmar ramah an cheng a, tuna kan ramri hman mek kan-aa In leh lo sa, an chenna pindan thenkhat India lama awm a, an pindan dang thenkhat Myanmar lama awm te pawh kan nei a ni. Chuvang chuan Naga mipuiten ramri hung hi kan rem ti thei ngai dawn lova, in dinhmun leh kan dinhmun hi thuhmun reng a ni," a ti bawk.

Y. Patton hian Chief Minister chu Nagaland-a zin tura sawmin, "Nagaland hian Mizo Chief Secretary pathum kan nei tawh a, Addl. Chief Secretary pakhat kan nei tawh bawk a, chutiang khawpa inpawh chu kan nih avang chuan i rawn zin ve ngei hi kan beisei a ni," a ti a, Chief Minister hian tihhlawhtlin sak ngei a tum tur thu a hrilh a ni.

An inkawmnaah hian hmarchhak state ten hma an sawn zelna tura hmalakna tur pawimawh nia an hriat te, a tul anga thawhho dan tur te, tun hnaia Chief Minister-in Delhi a tlawh chungchang te leh thil dangte an sawi dun a ni.

Nagaland Dy. Chief Minister hian Chief Minister hi Naga traditional dress leh an pasalthate ralthuam leh incheina te a hlan a, Chief Minister hi a nupui Liansailovi’n a tawiawm a ni.