Mizo Dance Camp leh Mizoram State Sports Council tangkawp buatsaihin 
June 27 - 30 chhung hian Mizoram Dance Sports & Movement Championship neih a ni dawn a, India rama lamthiam ber ber an fuan khawm dawn. 

He event-ah hian intihsiakna hrang hrang a awm dawn a, Dance Battle bikah hian India rama top dancer te endik tur leh showcase nei turin an lo kal dawn a ni. Crew Battle-ah hian hmarchhak state hrang hrang aiawhin crew an tel hlawm bawk ang.

Intihsiakna neih turah hian - Showdown Dance Battle, Jump Rope Championship, Aerobics Championship 
leh Hei Raw Dance Competition te a awm dawn a ni. Intihsiakna hrang hrangah hian lawmman tha tak a awm dawn a, Rs. 3,00,000/- an sem ral dawn a ni. 

Showdown Dance Battle
 atana main event hi Breaking a ni a, Breaking hi Olympics Sports-ah lakluh a ni tawh nghe nghe. Endik tur hian Bboy Flying Machine a lokal dawn a, ani hi India number 1 ni lai leh Olympics-ah pawh India aiawh tura hma theh zinga mi a ni. 

Hemi bakah hian Hip Hop Dance Battle-ah Tanuj chu judge turin a lokal dawn a, Mumbai val hian India aiawhin International-ah pawh sang tak a lo thleng tawh a ni. Rep Your Style battle-ah hian Srilakshmi, Gujarat lamthiamin a rawn judge ve thung dawn a ni. India hmeichhe street dancer-ah chuan hriat hlawh berte zinga mi a ni. Anni pathum hian Crew vs Crew Battle an judge thung dawn a ni.

Jump Rope Freestyle Male leh Female Open Category buatsaih tel a ni dawn a, Samuel Liansanga chu Judge tur niin, kum bithliah awm lovin jump rope thiam te tan duh ang tawka in show theihna hun siam a ni ang. 

Mizorama kan la neih ngai loh, aerobics championship buatsaih tel a ni dawn a, group leh solo category te siam niin, hetah hian aerobics set, mahni theihna leh thiamna, flexibility te athletics te leh creativity show na hun a ni ang. Gymnastic acrobatic leh fitness aerobics te pawh a leng vek dawn a, group-ah hian member 4-8 inkar tel theih niin, solo-ah hian kum bithliah awm lovin a duh apiang tan a tel theih thung dawn a ni. 

Endik tur hian Mizorama kan aerobics & fitness instructor neih that ber ber - Nutei Pautu, Esther Chhakchhuak leh Misty Hruaii te an thu dawn a ni.
 
Competition 
Group dance competition buatsaih a ni bawk dawn a, crew te, college dance clubs leh school dance team te tan tel theih a ni ang. Member 4 - 10 inkar tel theih niin, round 3 a awm dawn a ni. 

Round hmasa ber hi online video round niin, semi final leh final round a awm leh ang. Judge tur zingah hian Alan Rinawma, MDC Founder & Creative Director pawh a tel ang. 

MDC Showcase
 chu June 30 hian Dawrpui Multipurpose Hall-ah neih a ni dawn a, heng intihsiakna zawng zawng final round leh Mizo Dance Camp Showcase neih kawp a ni dawn a ni. 

MDC Team ten lam hmuhnawm tak tak an entir bakah MDC zirlai ten performance an nei dawn a, he performance atan hian Summer Intensive buatsaih a ni dawn a, June ni 1 hian class tan a ni ang.