Mizoram Doctor ten Churachanpur CH tan Nuai 7 chuang thawhkhawm || Health Minister hovin Doctor ten inkawmhona nei
![](/storage/news/post/9j8qWZnEqDrxp0AZ7fZk6RMPlndaVBPIkndw6GpO.jpg)
Aizawl May 8, 2023: Health Minister Dr. R. Lalthangliana hovin Medical Association hrang hrang - Indian Medical Association, Mizoram Government Doctors Association leh Non-Government Hospital Association of Mizoram hotute chu vawiin khan Manipur buaina avanga himna rawn zawng te chungchangah inkawmhona an nei. Health Minister chuan Mizoram Doctor ten Churachandpur Civil Hospital tanpuina tura cheng nuai 7 chuang an thawhkhawm chu lawmawm a tih thu a sawi.
Tualchhung buaina avanga Mizoram mi leh sa Manipur-a tangkhang mek te, Manipur-a Zohnahthlak awmte leh sahimna zawnga lo tlan te dinhmun ngaihtuah a inkawmhonaah hian Health Minister chuan sahimna zawnga rawn tlante chu kawng engkimah chhawmdawl zel an nih tur thu a sawi a, Mizoram Doctor ten Churachandpur Civil Hospital tanpuina tura cheng nuai 7 chuang an thawhkhawm chu ropui tiin entawntlak a tih thu a sawi.
Health Minister chuan nimin lamah damdawi tam tham tak vailiam a nih thu tarlangin tun ang boruakah, tangkhang leh hliamte ngaihsak leh ngaih pawimawhna lantir zel a nih chu lawmawm a tih thu a sawi. Minister chuan Churachandpur Medical Superintendent leh Doctor dangte nen an inbiak thu sawiin tun dinhmunah harsatna an tawk lem lo a ti a, Mizoram atanga damdawi thawn chungchangah lawmthu an sawi thu a tarlang bawk.
Health Minister Dr. R. Lalthangliana chuan Manipur Addl. Chief Secretary nena an inbiaknaah boruak muanawm a awm vat theih nan theihtawp chhuaha tan tlan a tul thu an sawidun a ni tih a sawi a. Manipur-a Mizo zirlai naupang leh hnathawka awmte chu Mizorama hruai haw mek an ni a ti a, reiloteah hruai haw kim thuai an nih tur thu a sawi.
Inkawmhonaah hian Mizoram mi leh sa hruai haw chungchang te, a tul anga chhawmdawl hnathawh dan tur te, Mizoram-a Meitei lehkha zir leh hna thawka awmte himna tur sawiho a ni a. Manipur leh Mizoram ramria khua awmte thawmthat leh mamawh chakkhai lam kawngah harsatna an tawh loh nana hmalak dan turte an rel. India ram chhunga nurse hnathawk tha bikte hnena hlan thin ‘Florence Nightingale Award’ Mizoram Nurse-te atanga dawng pha chinte chawimawi dan tur chungchang an rel bawk a ni.
Latest News & Chhiar Hlawh
-
1m | Sep 07, 2024
-
2m | Sep 07, 2024
-
1m | Sep 07, 2024
-
1m | Sep 07, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
3m | Sep 06, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
1m | Sep 06, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 05, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 04, 2024