September 13, 2022; Mizoram Election department in vawiin September ni 13, 2022 thleng a Tripura a inbenbel thlang, Mizoram electoral roll atanga bru voter an paih tawh zat chu 1,266 an tling tawh a, chungte chu corresponding deletion request an dawn ang a paih te an ni.

ZALEN thudawn danin, Mizoram Election depatrment in Mizoram electoral roll atanga a paih tawh te hi Mamit district chhung, Hachhek bial atangin 791, Dampa bial atangin 48 leh Mamit bial atangin 235, an vaiin 1,074 an ni a, Kolasib district chhung, Tuirial bial atangin 79, Kolasib bial atangin 29 leh Serlui bial atangin 67, an vaiin 175, Lunglei district chhung, Thorang bial atangin 6 leh West Tuipui bial atangin 11 paih tawh an ni.

Mizoram electoral roll atanga Bru voter paih mek an nih chungchangah August ni 9, 2022 khan MNF party chuan thuchhuah siamin, thil chhinchhiah tlak tak a nih thu an lo tarlang tawh a, ram tan mellung pawimawh tak phunna a an ngaih thu te, Mizoram sawrkar hmalakna chhuanawm an tih thu leh hma a lakna zel turah sawrkar chungah rinna an nghah thu te tarlangin, chutih rualin, Tripura sawrkar nen thawhho ngai a nih avang leh voter te duh thlannaa tih ngai a nih avangin tih zung zung theih a ni lo tih an lo tarlang tawh bawk.