June 24, 2022; Mizoram atanga Tripura a tlanchhia, Bru voters mi 934 te chu Mizoram electoral roll atangin paih an ni tawh a, midang pawh paih chhunzawm zel tum niin, Tripura lamah bye election neih a nih vangin hmalakna a muan phah hret nia thudawn a ni.

Election department hotute hnen atanga ZALEN thudawn danin, tun thlenga Mizoram electoral roll atanga paih tawh mi 934 te chu June ni 17, 2022 thlenga hmalakna niin, hemi bak hi chu election department lamin update dang dawn an la nei lo.

Chief Electoral Officer, Mizoram chhinchhiah danin kum 2018 MLA inthlan dawn khan Tripura-a tlanchhia Bru, Mizoram electoral roll-a hming chuang (vote nei) hi 11,232 an awm a ni.

Kum 2020, January thla khan sawrkar laipui, Tripura sawrkar leh Bru pawl aiawhte chuan inremna an lo ziak tawh a, Bru refugee te chu an awmna tur ram ft 40X30 a zau pek tur a ni a, fixed deposit in Rs. 4,00,000 dahsak tur an nih bakah, kum hnih chhung thla tin Rs. 5,000 leh a thlawnin ration pek tur a ni. Hengte bak hamthatna dawn tur dang ruahmansak an ni bawk.