ZALEN September 9, 2023 : Mizoram Ex-Services League chuan Vawiin khan Vanapa Hall ah khawmpui vawi 34-na an hmang a, rorel inkhawma an ngaihtuah zinga pakhat, "Mizoram sawrkar hnalaknaa Ex-Servicemen te Reservation chungchang" tih chu High Court-ah petition thehluta kalpui nise an ti.

He khawmpuia khuallian Home Minister Lalchamliana chuan Mizoram sawrkar in Ex-Service te chu an duhsak thu leh Police an lak turah pawh seat 5% a hauhsak bakah Home Gourd atanga Police a lut turte tan pawh sawrkar chuan ngaihtuahna thui tak sen tawh laiin Covid hripuiin harsatna a siam sak thu a sawi. Sawrkar chuan ti hlawhtling turin hmalakna a kalpui mek a ti.

Home Minister chuan, "Sipai tan hi mahni, chhungkua leh khawtlang tan thiltha a ni," a ti a. "Sipaite hi ram leh hnam humhintu an nihna piah lamah chhungkaw chawmtu leh khawtlang tan mi tangkai an ni a. Mizo zinga IAS leh sawrkar hna lian dang thawk zingah sipai fa an tam hle a ni," a ti bawk.