1. A bul thum: Mizoramah pawh state dang angin ‘Forest Reserve’ kan nei ve ngei mai. Lal lal lai phei chuan khaw tinin ram kangin khua a kan thlen loh nan khaw Reserve ngaw zau tak hmasang atangin an lo zuah thin a, hriselna lamah pawh boruak tha tak an nei a ni. Forest Reserve chungchang hi mipuiten kan hriatchian atan a tul hle mai. Mi thenkhatten ‘Luipui dung zawng zawng hi Forest danin a sawi angin Forest ram vek a ni’ an ti thin a, mahse heng hi a ni vek lo a ni. Dan tam tak a awm a, a history kan hriat theih nan Mizoram Forest chungchanga Dan kan hriat theih thenkhat kan tilang tel puat thin ang. ORDER NO. 2: Dt 13th May, 1904. It is hereby notified for the information of public that the rules for the management of the forests in the Lushai Hills passed by the Honorable Chief Commissioner of Assam vide secretary the Chief Commissioner’s No. 75 forest. 1776 – R. dt. Shillong 22 April. 1904 will take effect in this district from the date. Sd/- J. Shakespear, Major Dt 13 may, 1904 Superintendent Lushai Hills Hei hi Forest Sq. Km 1317 lai a ni, hetih lai chuan Mizoram thenkhat pawh a la tel a ni. Tun thlenga Assam-in min neihsak tum a, an la kawl zui reng hi, ‘The forest in the Lushai hills’ tih a nih khi. Mahse 1972 UT kan nih khan a zatve deuhthaw Mizoramah an behtir tawh a. Assam lam ngaihdan chuan kan ta tur a awm tawh lo va; mahse, order chhuah hlim vela a ram pum puia mi cheng ziah lanah Mizo hnahthlak an tam ber avangin Mizo hranghluiten an la hauh zel niin a lang. Kum 1890 atanga Saphoin min han awp beh khan khaw thenawmte nen inrun mai mai kan ni a. Kan ram forest tax te chu enkawl thiam ziazang kan ni lo va, sorkarin Forest timber a mamawh reng si avangin Assam sorkarin min enkawlsak a “Forest of the Lushai Hills” tih a nih khi. A chhiah chu Mizoram Roreltute (superintendent) hnenah pek luh a ni thin awm e. 2. Mizorama Central Policy: Kum 1966-ah Rambuai kan lo ni a. India sipai rawn chhuak chu Saktiman 6 leh Jeep 4, sipai an that vek a, motor an hal vek a. Delhi a thlen chuan India sorkar naupang tak tan chuan a ngeiawmin Mizote chet dan hi a rapthlak ve tlat a. Hei vang hian Mizorama roreltu tur an rawn dahte pawh rilru nei ran leh Mizote chak loh dan tur ngaihtuaha policy duang thiam tur rawn dahin Agriculture lamah Teak thing leh Tung min chintir a, ‘Waste land Development Project’ tiin Forest lamah pawh profit tak tak aia ram retheihna tur niawm takin Tungthingte chuan kan ni kang ram a luah a. Tungthing rah hi naupangin an lo ei thin a, an thih phah nual a ni. Hemi zara Central policy pakhat kan luikam leitha thlai tharna tur leh Buh thar hlawkna ang chi kha kan Rambuaia kan tankhawh rei theih loh nan ‘Forest Act, Riverine Forest Reserve’ tiin min puan hnan a ni awm e. Mahse, he dan hi a ram mi cheng nen a inrawnchianna awm lo a nih chuan a nung reng tur pawh a ni lo. Rambuai lai kha chuan, Central sorkar khan chhuanlam atan ‘One man commission’ hmingin thil tam tak a ti thei ang. Tin, UT kan nih dawn khan kan phai leilet buh thar tam theihna hmar lam Champhai leh Bairabi, Builum chhuah vel reng reng hi North East Reorgnization Act, 1971 Mizote rawnna em em awm loin Boundary min rawn siamsak a, anmahni siam a ni. 3.Peace Accord 1986: Peace Accord kan han nei a. State kan han ni dawn a. Mizo district boundary ,North Eastern Area Reorganization Act 1971-in a sawi ang kha tawngkam langsar lo deuh main an lo draft tel leh a, heng hi an sign-tir mai a ni. Mahse, heng hi India Contract Act Change Aggrement’-in a sawi dan ang chuan pawm theih a ni lo. A tawn tawn party-in rilru harh fimin (voluntary agreement) an inrem tur a ni. Thlemna emaw, vaubeh emaw, thil tawktarh emaw it vangin remna siam chu a puitling lo. Heng dan tricky tak tak rual hian luikamte pawh Forest Reverine Forest Reserve te pawh an puang a ni awm e. Mahse, dan thenkhat chuan Tribal te dinhmun hlau tak leh humhalh takin a kalpui thin reng a. Tribal te tana hnawk turin dan hi an zam ngai lo a ni. Chuvangin, heng dan chang: Implication of the Forest Right’s Act of 2006 in the North East-in a sawi danin humhalh kan ni thei. Hun kal tawh lama hnam tenau chunga thiltih sual leh tihdik loh, tihdik lehna tur a ni. State kan nih hnu hi chuan Central-in dan a puante chu State-ah hman nghal tura ngaih a ni a. Amaherawhchu, Mizorama chengte hi Schedule Tribe kan ni a, kan Mizoram chungchang India Constitutions Article 371 G (a)-ah kan vohbik nihna, kan custom, kan Traditional practice-ah huan lo neih, “Shifting Cultivation” kan tih hi chu Pu Nehru hun laia min hriat tawh a ni. Chuvangin, kan Customary leh Traditional chhawmnun zel hi danah kan thiang a ni. 4. Scheduled Tribes and Other Traditional Forest Dweller (Recognition of Forest Right) Act 2006: He danah hian (1) Traditional dwellers. (2) Other traditional dweller an ni (Triditional Dweller hi a ram mi cheng a ni. No 2 hi Kum 75 aia tlem lo he hmunah hian a lo cheng ve bawk tur a ni). Mizote chu Tribal kan nih miau avangin kan Customary law constitution-in min phal angin kan hmang thei a. (Section 3(1)(j)) Tin, Section 3 (1) (1)-ah pawh hian ramsa pelh leh thangkam te, ramsa taksaa sumdawn tih chauh loh chu forest khawilai pawh chhawrtangkai theihna tribal ten right an nei a ni. Tichuan, heng section te hian kan nu leh pa, pi leh pu atanga kan lo rochun ram kan la tih dan thinah hian sorkarin ram a duh/mamawh a nih pawn an lo luah tawh sa – thlai an lo ching a nih phei chuan compensation an lungawina tawk emaw, a tlukpui hlutna sum a pe lo a nih chuan luahlan ngawt a thiang lo va. Ram thenkhat phei chu sorkar meuhin a duh pawhin ‘Land Acquisition Act’ hmang ngeiin a laksak tur a ni. Chu danah chuan a ram laksaka te hlawkna tur a awm ngei bawk tur a ni. Tin, Schedule area, Pawi, Lakher, District (sixth Schedule) area-ah ngat phei chuan an council-in an rem tihna lo chuan khawi sorkar mah hian an ramah hian thuneihna an nei lo tih hi kan hriat a tha (TN. Godavarman Thirumalpad –vrs- Union of India) Hemi SC thutlukna ang chuan Court pawhin Forest department ten a hma daiha scheme leh project an siam a, an lo luah tawh a nih ngawt loh chuan tihluihnaa ram lakluihsak theihna a nei thei lo. Chuvangin, North Eastern Area-ah chuan Schedule District leh Autonomous District Council te chuan zalenna zau tak an nei a. An state Assembly-in dan khauh tak a siam a nih chuan a siamtha turin an nawr mai tur a ni. Tin, Forest Right Act 2006 dan pawh hian Tribal/a ram mi chengte chunga dan lo tihsual leh hmaihthelh thil siam that lehna kawng zel a la ni. Chuvangin, Mizoramah kum 1902 chho J. Shakesphere-an Lal ram a then atang khan chung ram lo luah reng rengte chu mahni ram chhung theuha awmin kum 1952-ah Village Council kutah a awm leh a. Ram mipuiten an ram chu luipui kam a ni emaw, khawilai pawh an ram a ni a, hei hi The Lushai Hills District (Jhuming) Regulation 1954-in thuneihna a pek anga kal zel kha a ni. Tin, kum 1952 Forest Act kha kan State 1987, State Re Organization Act-ah khan seng lut zuiin he danin thuneihna a pek angin Forest chungchang chu Constitution-ah State List-ah a awm ta a. Forest chu state sorkar thuneihna hnuaiah a awm ta a ni. Chuvangin, kan ram mipui eizawnna, hmasang atanga an lo chin than leh an pi pu atanga lo inrochun thin a tih kha Indigenous Forest dweller Act tih ka sawi khan a dah lal viau ani. Chuvangin, thingtlang an eizawnna kawng hi tihbuai mai mai thiang a ni lo. Tin, a ram mi chengten sumdawn nan luipui hmangin an thawn chhuak thin a nih si loh chuan a ram leilung hausakna, a mamawh tawk an hmang thiangin an la thei a ni. An mamawh tawk an hman khapna dan chu a awm lova. A awm a nih pawn natural dan kalh a ni thei ang. Natural dan kalh chu Court lamah a valid lo bawk ang. Mizoram pawh mipuiten kan chepa kan inhriat chuan keimahni MLA te hmina Assembly-ah siam that rawt mai tur a ni. 5. Leilung Dan: “Terra Manues Occupanti Considetur” Ram, Ni eng, Tui, Boruak heng hi Khuanu siam a ni a, a tel lova nun theih lohna a ni. Heng thil zinga tuma la hman ngai loh chu a hmang hmasa bertu hnenah permit ‘LSC’ pek tur a ni a. Eizawn nana a hman thlai theirah chhawr tangkaina a awm a nih chuan tuman an chhuh thei lo ang. Sorkarin ram a chhawr tangkai emaw, development atan a duh a nih chuan Land Acquisition Act dan hmangin compensation a neihsak thei chauh ang. Chu chu danin a sawi angin ram lo chhawr tangkaitu chuan hlawkna a hmu let ve ang. Hetih lai hian Mizoramah hian a ram mil zawng a ni nge ni lo ngaihtuah lovin ram dang thlai/thing/mau kan ching thin. Kan ram thing, a ram leilungin a lo hrin sa Ngiaupui, Tatkawng, Khiang, Char, Thingvandawt te hi kan ramin a ngeih a, ching mai ila. A ram leilungin a hrinsa suat rema ram dang thlai leh thing thlak kan tum nazen pawh hi thil mawi a ni vak lo mai thei. Kan ram thlai thing leh mi ram thing thlah pawlh (Hybrid) kan thiam erawh chuan a ngaihthiam theih chauh ang. Thlak policy hi kan ramhmul leh nungcha te tan kan demawm viau thei ang. Dr.Lalnuntluanga Kiribati-a a kal khan Balhla Mizorama mi, a lian chi a hawn thla a ni awm e. An ram chuan Airport-ah an lo dang tlat, an duh ringawt lo a ni awm e (Romei Sep 1999 issue) Kan ram leilung thing leh mau leh thlai hmasang atanga Zofate lo awitleitu, tuna taka thlak kan tum phet hi rannung, sava, thing te, tui te, boruak leh thlai tan kan ngeiawm lutuk deuh lo ang maw “Rilru uiresan a ni.” Mahni hnam dan leh sulhnu chhui let ila, mi hnam tihdan kan entawn thlazen lutuk hi ban hret hret teh ang u. Mahni chhia leh tha hriatna kan hman theih chuan kan changkang tihna a ni thei ang. - C.VanlalRuaia