Aizawl November 1, 2022 : BJP Spokesperson Lalremsangi Fanai chuan, "Mipui hriselna ngaipawimawh duh lo sawrkar hnuaiah Mizoram Healthcare scheme a tlu chhe mek. Chutihlaiin khawvel a Healthcare Scheme lian ber AB-PMJAY (Ayushman Bharat-Pradhan Mantri-Jan Arogya Yojana/Prime Minister National Health Protection Mission/PM Healthcare Scheme) kalpui a ni hlauh a. Central sawrkar chungah lawmthu sawi mawlh mawlh hi kan tih tur a ni," a ti. 

Remsangi chuan, "MNF sawrkarin Mizoram State Healthcare a kalpui anga state sawrkarin damlo te leh Hospital-te hnena inenkawlna senso a ba tam tih hi mitin hriat vek a ni, Mizoram State Healthcare a chhungkua inziak lut 39505 te thawhkhawm pawh Rs.71237000 lai a ni a. Mipui thawhkhawm hi khawnge an luanral tir?, tih hi zawhna lian tak a ni. Mipui Leiba ti pung tura Loan hmanga Health Care enkawl tum pawh hi mipui zahlohna a ni. Contract leh thil dangah pawisa harsat sawi si lo. Mizoram State Health Care kalpui ve chungchangah Chief Minister emaw Health Minister in phat mawina zawn reng hi a zahthlak,"a ti bawk.

Prime Minister Healthcare Scheme chungchang sawiin, "Mizoram chhungkua 226147 atangin AB-PMJAY Scheme ah chhungkua 194859 kan in ziaklut thei a, chhungkaw tam zawk ziah luh loh leh inziah luh nachang hre lo kan la tam hle. In ziaklut thei-ah hian 2018-a RSBY (Rashtriya Swasthya Bima Yojana/ National Health Insurance Programme) Card nei te an tel a. Tun dinhmunah inziaklut thei chanve pawh kan la inziak lut lo tih a lang. Engatinge Prime Minister Healthcare Scheme chhawr kan tlem?. Kan state sawrkarin mi harsate a ngaihsak lo tih a lang," a ti.

BJP Spokesperson chuan, "Central Schemes & Programme te a chhawrtu tur mipuite hnen thleng turin Mizoram BJP chuan beihpui thlak  kan puang a. PM Healthcare Scheme a cheng nuaih 5 thleng chhungkaw tin tana a taka pawisa dahsa vek a awm tih pawh kan puang nghal a. Hemi dawng turin inziahluhna man emaw hospital a inenkawlna bill chawi hran a ngai lo in central sorkar in a chawisak vek a. Natna khirh bik enkawlna phei chu special lehzual in tanpuina Scheme a la awm cheu a ni. Mizoram mipui a tam thei ang berin PM Healthcare Scheme (AB-PMJAY-) a in ziaklut a, chhawr tangkai a nih theihnan BJP Headquarter Aizawl leh District Office ah te kan lo tanpui thei reng che u, tih kan sawi duh a ni," a ti.

Lalremsangi Fanai chuan, India ram Healthcare hi tha lo nise khawvel Economy tehnaah Europe ram ropui tak tak te chungah India a leng thei lo. Tuna India ram rorelna hi tha lo nise, India mi UK-ah a Prime Minister lo ang. Ram dinchhuahna leh tlukchhiatna hi Economy a in nghat a ni a. Tun a Mizoram kalphung Hausa leh Rethei kar zau ta lutuk hi kan tlukchhiatna khuarkhurum chu a ni. Sakhuana hmatheha Politics kan khelh thin bansan a, ram rorelna tha hmanga Zofate dinchhuah tir tumna hi mitin vei leh buaipui tur a ni.