I&PR Auditorium, CHANEM, Champhai-a State Day lawmna chu Bawrhsap Maria C.T.Zuali chuan a hmanpui. Sawrkar chu tu dang nilovin sawrkar siamtu mipuite an nih avangin ram hmangaihna rilru pu tlat chunga mahni mawhphurhna theuhte dik leh fel taka hlenchhuah tum turin mipuite a chah a ni.

Lunglei-ah pawh Convention Centre, Lungleiah Mizoram State Day, 2021 lawmna hun chu Lawmawma Tochhawng, HPC Vice Chairman hova neih a ni. State Day lawmnaah hian Lunglei District head of office-te, tlawmngai pawl hrang hrang aiawhte, political party hruaitute, media mite leh sawm bik dang te an kalkhawm. HPC Vice Chairman chuan, Sawrkar hnathawk kalkhawmte pawh thahnem ngai taka ram leh hnam hmasawnna tura theihtawp chhuah chhunzawm zel tura chahin tlawmngai pawl, media leh political party te nena thawhhona tha tak chu chhawmnung zel turin a sawm.

Mizoram hmundang te rualin Siaha-ah pawh Mizoram State Day Vawi 35-na urhsun taka lawm a ni. Lawmna programme hi DRDA Conference Hall-ah neih niin, N.Zakhai, CEM, MADC chuan Khuallian niin programme a hmanpui. CEM chuan, India rama state Pakhat kan nih ve theih nana kan hruaitu hmasate thawhrimna leh inpumpekna te min hriat chhuah thartir leh se. State ralmuang nih nawmzia leh hlutzia te, Mipui rorelna sawrkar hlutzia te min hriat nawntir lehin, Khua leh tui ni tura kan mawhphurhna theuh te a tharin min hriatchhuah tir leh mawlh rawh se, a ti.

Serchhip-ah chuan DC Conference hall-ah Mizoram State Day, 2021 lawmna buatsaih a ni a. Serchhip Bawrhsap Pu Kumar Abhishek, IAS chu khuallian a ni. Khuallian chuan, “Mizoram chuan kan hriat theuh angina hun rei tak rambuai a tuar a, kum 1986 ah inremna lo awmin chuta chin chu vawiin thlengin state ralmuang leh hmun him ber te zinga mi a lo ni ta zawk a. State-a hlan kaia awmin hmasawnna leh inrelbawlna kawngah state dang tam takte tan pawha entawn tlak khawpin hma a lo sawn ta a ni,” a ti.

Lawngtlai District chuan DC’s Conference Hall-ah he hun hi hmangin Deputy Commissioner Dr Andrew H. Vanlaldika chu Chief Guest a ni a, he hun hi Lai Autonomous District Council (LADC) Chief Executive Member (CEM) Manghmung Chinzah, LADC member te bakah LADC leh state sawrkara official te bakah ex-servicemen, NGOs leh political parties te an tel bawk.

Khawzawl-ah chuan Zaingen YMA Hall, Khawzawlah Mizoramin State puitling a nih champha vawi 34-na State Day, 2021 lawmna hun hman a ni. Zothanmawia, Deputy Commissioner, Khawzawl District chuan Khuallian niin a hmanpui.