Aizawl: Mizoram State Child Protection Society chhinchhiah danin March 2019 tawp thleng khan Mizorama Home hrang hrangah naupang 920 an awm a. Kum kalta April 2018 atanga March 2019 inkar chhungin home a dah thar mi 619 leh home chhuahsan mi 823 an awm a ni.
Mizoram State Child Protection Society (MSCPS) thawktute hnen atanga Zalen thudawn danin kum kalta chhunga home-a dah thar mi 619 zinga 184 hi hmeichhia niin 435 chu mipa an ni a, home chhuahsan 823 zinga 269 chu hmeichhia niin mipa 554 an awm bawk. Naupang zawkte dahna Childrens home-ah hian lut thar 339 awmin home chhuahsan 527 an awm a, tunah hian naupang 830 an kawl mek a. Enkawl ngai bik enkawlna, Observation home-ah lutthar 208 awmin home chhuahsan 227 an awm a, tunah hian mi 38 enkawl mek a ni.
Thilsual tih vanga thiam loh changte enkawlna hmun, Special home-ah dahluh thar 45 awmin home chhuahsan 48 an awm a, tunah hian mi 31 enkawl mek an ni . Special adoption agency-ah dahluh thar 27 leh chhuahsan 21 awmin tunah hian mi 21 enkawl mek an ni.
Mizoramah naupang enkawlna home ‘Child Care Institution’ 52 a awm mek a, hengte hi Childrens home 35, Observation home 8, Special home 2 leh Specialised Adoption agency 7 te an ni.
MSCPS hnuaia mi Child Welfare Committee hian kum kalta chhung khan case dawn thar 869 neiin kum hmasa lama awmsa 80 nen a vaiin case 949 an nei a, case 910 chingfelin kumthar lama ngaihtuah chhunzawm tur case 39 an dah a ni. Juvenile Justice Board hnuaiah kum hmasa lama case lo neih 95 bakah case lutthar 220 nen case 315 an nei a, case 265 ching felin case 50 chu kumthar lama ngaihtuah chhunzawm turin an dah bawk. JJB case zingah hian rukruk case chu a tam ber a ni.