Aizawl January 21, 2024 : Centre For Innovation’s & Public Services (CIPS) leh Administrative Staff College of India, Hyderabad-in an buatsaih, CIPS innovative award in the field of Information Technology chu a vawi khat nan Mizoram-in Online RTI project atangin a dawng.

Award hian Rs. 1,00,000 leh trophy keng telin Zirtawpni khan Shillong-ah Meghalaya Chief Minister Conrad N Sangma chuan Mizoram State e-Governance Society (MSeGS) Project Manager Isaac Zothanpuia kutah a hlan a ni.

Online RTI hi General Administration Department (GAD), Mizoram Information Commission (MIC) leh Mizoram State e-Governance Society (MSeGS) te tangkawpin an siam a ni a. Online RTI hian sawrkar kalphung nasa taka sawi danglamin langtlang zawka sawrkar a kal theih nan nasa takin a pui a, mipuiten awlsam taka sawrkar hmalakna an phone leh computer hmanga an theih luh theih nan te, online hmang a an RTI zawhna chin an chhui zui theih nan te, an chhanna dawnah an duhthusam a nih loh pawh a thuneitu sang zawk leh Chief Information Commissioner thleng pawha online hmanga an zualko theihna tur a mipui tan a duan a ni.

Kum 2021-22 online RTI awm hmaa RTI zawhna lut zawng zawng hi 1,327 a ni a, 2022-2023 online hman hnua RTI zawhna lut zawng zawng hi 5,241 niin hei hian online RTI hian nasa takin sawrkar rorel kalphung a tidanglam a, mipui tan awlsamna, rang zawk leh sawrkar langtlang zawk a thlentir a ni.