Aizawl November 1, 2022 : Parliamentary Standing Committee on Commerce Member atana ruat thar K.Vanlalvena, Member of Parliament (RS) chuan an Chairman Dr Abhishek Manu Singhvi hova Parliament House Committee Room-a Thawhtanni-a meeting an neih naah Mizoram-in ram danga thawnchhuah tur a ngah thu a sawichhuak.

He meeting ah hian thupui pahnih - Foreign Trade leh State Trading chungchangte sawiho a ni a. Vena hian Mizoram in India ram pawna thawnchhuah tur sector hrang hrangah a neih thu leh a bik takin Agriculture, Horticulture, Forest, Sericulture leh cane & bamboo product bakah handloom & handicraft lamh thahnem tham tak kan neih thu a sawi. 

Rajya Sabha MP chuan, Bangladesh leh Mizoram inkalpawhna kum 75 lai khar a nih tawh avangin sumdawnna in a tawrh bakah Myanmar ram buaina avanga sumdawnna lama harsatna Mizoramin a tawh thu te a sawi lang. Mizoram khawthlang lam ramri a awm Kawrpuichhuah hmuna Indo-Bangla Trade Centre peih fel thuai chu Mizoram economy tan a pawimawh thu te a sawi bawk.

K. Vena chuan tun hnaiah UAE Embassy a tlawh thu leh Mizoram thlai thar chi hrang hrang UAE-a thawn chhuah dan tur UAE Ambassador a sawipui thu meeting-ah hian a sawi a. Mizoram atangin Arabia ramah bungrua thawnchhuah a nih theih nan bungraw phur Rêl service regular tak leh bungraw phur thlawhna service Mizoram-in kan mamawh thu a thlen bawk.