Aizawl: Mizorama jail hrang hrang 10-ah mi tang 1,388 an awm mek a, chung zingah chuan dam chhung tang tur mi 49 awmin, an zinga pakhat chu hmeichhia a ni.

Prison department hotute hnen atanga ZALEN thudawn danin, tun dinhmuna mi tang awm mek zinga 876-te chu an thubuai court-a ngaihtuah lai mekte an ni a, mi 213-te chu thubuai lian tham, hremna pawh na tak dawng tura thiam loh chantir tawhte niin, mi 244-te chu thubuai tenau deuh, hremna pawh nep deuh zawk dawng tur a thiam loh chantir tawhte an ni.

Jail hrang hrangah naupang, mipa pahnih leh hmeichhia pali awm an awm mek a, chung mite chu thil tihsual an neih vanga awm ni loin, an nu/pa emaw vanga awm tel ve an ni.

Central Women Jail (CWJ)-ah naupang pali awmin District Jail, Lunglei leh District Jail, Champhaiah pakhat ve ve an awm.

Tun dinhmuna mi tang awm zawng zawng mi 1,388 zinga 1,223 chu mipa an ni a, 165 chu hmeichhia an ni. Dam chhung (lifer) tang tura thiam loh chantir (convict) tawh mi 48 zingah hmeichhe pakhat a tel a. Dam chhung tang tura thiam loh chantirte hi tualthat an ni deuh vek nia thudawn a ni.

Dam chhung tang tura thiam loh chantir tawh mi 49-te chu Central Jail, Aizawlah tantir an ni a, hmeichhe pakhat chu Central Women Jail-ah tantir a ni.

Prison department hotute chuan Mizorama jail hrang hrangte chu a theih ang anga thuam that tum mek a nih thu ZALEN an hrilh a, ei leh in lam bakah thuamhnaw/mutbu etc. lamah pawh an phak tawk a thain ruahmanna an kalpui mek zel tih an sawi.