May 10, 2022; Chief minister Zoramthanga'n Mizoram Legislative Assembly chu, India ram state dang ten entawntlaka an ngaih a nih thu sawiin, Pathian malsawmna ropui leh thilpek hlu ber kan dawn 'Remna leh Muanna' chu, mamawh ngawih ngawihtu India ram chhim leh hmar chhak leh thlang a thawn chhuak tur kan nih thu a sawi.

Mizoram Legislative Assemby kum 50 tlin lawmna pual special session vawiina neih ah he thu hi sawiin, chief minister Zoramthanga chuan, India ramin kum 75 independent a neih champha a lawm rual a, Mizoram Legislative Assembly in kum 50 tlin lawmna kan nei thei chu vanneihthlak a tih thu leh Pathian kaihhruaina nasa tak kan dawn a nih thu a sawi.

Mizoram Assembly chu kum 1972 a tan a nih thu leh hun khirh leh hun harsa tam tak a paltlang hnu, vawiin ah kum 50 na a lo thleng ta chu lawmawm a tih thu sawiin, "Tunah chuan entawntlakah alo tang ta a, entawntlak assembly session a nih chhoh zel kan ring bawk a ni," a ti.

Zoramthanga chuan kan ram inthlanna pawh entawntlak a ni tih sawi bawkin, "Mi ramah chuan paramilitary forces company 100 telin an inveng a, keini chu polling booth kil lamah police 2/1 an din chuan a tawk em em a ni. Local inthlan phei chu a zanah kan zo mai a, kan inthlan dan te hi mi rama sawi chuan mak an tih a ni. Chumi in a thlan chhuah, member te pawhin entawntlakin house kan siam a, ropui ka ti tak tak a ni," a ti bawk.

Entawntlak kan nihna te chu awm bawk mahse, entawntlak loh kan nihna a tam hle tih sawi bawkin, chief minister chuan, "Economy a hmasawnna ah entawntlak kan ni ti ta i la, a ni bik hauh lo, health sector ah pawh kan aia tha an tam, thil dang dang eng engemaw ah entawntlak kan nih lohna a tam. Mahse vawiin a miin entawntlak a min ngaihna leh mi sawi kan hlawhna chu, remna leh muanna kan neih hi a ni," a ti.

"Khati khawpa rambuai, machine gun nen a rik mup mupna kara kan awm hnuah, kum 30 chuang remna leh muanna tha em em, entawntlak kan nei hi a hlu a, chumi kawngah chuan entawntlak kan ni," tiin, "India ram mihring maktaduai sang aia tam awmna kar a, maktaduai 1 deuh chauh awmna Mizoramin India ram chhim, hmar, chhak thlang a an mamawh ngawih ngaiwih thawnchhuah tur kan neih chu he kan remna hi a ni," a ti. "Pathian malsawmna kan neih remna leh muanna thawnchhuak tur hian Pathian in min beisei a ni ang tih hi ka ring," tiin, hmanrua atana hman tura Pathian thilthlawn pek kan dawn a nih thu a sawi.

"Pathianin ramtin te hi talent min pe a, keini pawh he malsawmna ropui tak min pek hi kawl mai mai turin min pe lo a, thawnchhuak turin min ti a, he thilpek hlu ber min pek hi thawnchhuak a, India ram leh khawvel a hmang thiam turin Pathian hian min pek rual hian min phut nghal ang tih ka ring...kan thawnchhuak tawh a, kan thawnchhuak mek a, kan thawnchhuak zel dawn," a ti bawk.

Vawiin Mizoram Legislative Assembly kum 50 tlin pual a special session ah hian speaker Lalrinliana Sailo in member te lawmna thu sawiin, Governor, CM Zoramthanga, Biswajit Daimary, Assam assembly speaker bakah Legislatur party aiawhin, Dy CM. Tawnluia, Lalduhoma leh Niharkanti Chakma bakah Dr. BD Chakma ten thu an sawi. Special session ah hian speaker lo ni tawh thenkhatte leh member lo ni tawh mi engemawzah an tel.