Aizawl November 17, 2022 : Mizoram leh Assam Sawrkar hotute leh aiawh ten Mizoram leh Assam ramri buai chinfel chungchangah High Level Delegation inbiakna vawiin khan Hotel Vivanta Guwahati ah an nei. Ramri-a chengte dinhmun zirchiang tura hmalakna leh Kuhva tawlh chungchang chu he inbiakna luahtu a ni.

Assam leh Mizoram Sawrkar Minister leh official te chuan hemi chungchanga inbiakna neia thuchhuah intawm siam tawh te thlir letin, chung te ngaihtuah chunga hmalakna awm thei nia an ngaih te chu an sawi a. Hun rei tak sawihona an neih hnuin thuchhuah intawm Joint Declaration an siam. Thuchhuah intawmah Mizoram sawrkar aiawhin Home Minister Lalchamliana’n hming a ziak a, Assam Sawrkar aiawhin Border Protection & Development Minister Shri Atul Bora in hming a ziak ve thung a ni.  

Thuchhuah intawmah hian Mizoram Sawrkarin ramri nia kan pawm huamchhunga khua awm te, an huamchin te, a geo spatial extent te, heng hmuna cheng mihring chanchin leh hnam awm (ethnicity) chanchin te leh chanchin dang te chu thla thum chhunga lak khawm ni se tih a ni a. Heng chanchin kimchang lakkhawm tur te chu a tul dan azirin ramri buai chingfel tur atana la din theih, state pahnih aiawhte telna Regional Committee te zirchian tura dah a ni. Chanchin lakkhawm kawnga Assam sawrkarin Mizoram sawrkar chu a theihna apiangah an pui ang tiin an inhuam thu ziahlan a ni. 

August ni 5, 2021-ah Aizawla an inbiak tuma thuchhuah intawm siam chu state pahnih ten vawng nung zel se tih a ni.  State pahnih ten ramri hrula cheng mipuite inkara boruak muanawm a awm zel theih nan thawh chhunzawm zel ni se, tih ziah a ni bawk. Mizoram High Level Delegation-in Mizorama Kuhva chingtuten an tharchhuah state pawna Assam kal tlanga an phurchhuahnaah harsatna lian tak an tawh mek chungchang an thlen pawh sawiho niin Kuhva chingtute harsatna tawh mek chinfel a nih thei nan State 2 Chief Minister te hnenah hei hi thlen ni se tih a ni. State 2 ten dan phal lova ramdang tharchhuah Kuhva tawlhruk phurh chungchangah na taka hma lak chhunzawm zel ni se tih ziah a ni tel bawk.

Thuchhuah intawm ziah hnuin Assam High Level Delegation hi Border Protection & Development Minister Atul Bora chuan Chanchinbu mite hmaah Joint Declaration hi a chhiarchhuak a ni. Lalchamliana chuan Mizoramin ramri kan pawm chu 1875 a inziah ang a ni a, he kan tan chan tihchian nan Joint Verification kan rawt a ma hse, Assam lam chuan hemi atan hian helai bawra chanchin kimchang lakkhawm ni se an ti a, kan tan chan tih chian nan thla thum chhungin details te hi kan la khawm ang, a ti. 

Lalchamliana chuan, "Mizorama kuhva chingtute tharchhuah Mizoram pawmna Assam kaltlanga phurchhuahna kawnga harsatna an tawk a, India ram chhunga khua leh tui ten an tharchhuah hralhna kawnga hetiang taka harsatna an tawk hi a vanduaithlak a, chinfel a nih vat theih nan Mizoram leh Assam sawrkar te a rualin hemi chungchang hi sawrkar liaipui sawipui leh nawr a tul takzet a ni. Mizoram sawrkar chuan ramdang tharchhuah Kuhva Mizoram leh state dang te kaltlanga tawlhruk chu a veiin a la thu tak hle a, tunhnaiah pawh dan kalha Kuhva tawlhruk man a nih theih nan Check Post 2 siam belh a ni," a ti.