Aizawl August 11, 2024 : Sawrkar laipuiin mipuite him zawkna atan khualzin leh mipui hman chi lirtheiah an awmna chin hriat theihna tur, ‘Vehicle Location Tracking & Emergency Alert System (VLTS)’ vuah tura thupek a chhuah hnuah Mizorama lirthei 409-ah he khawl hi vuah a ni tawh.

ZALEN-in Transport department thawktute hnen atanga thu a dawn danin VLTS hi Mizoramah chuan August 29,2023 atang khan kalpui tan a ni a. January 1, 2019 hnu lama lirthei, mipui phur chi te chuan an vuah ngei ngei a ngai a. He khawl hi an vuah lo a nih chuan an lirthei an register thei lo a ni.

VLTS hi khawl tereuhte niin lirthei khalhtu leh a chuangte inkarah dah a ni a. Eng emaw harsatna an tawh chuan khawla hmeh tur kha hmetin chu signal chu Transport department-in darkar 24 chhung an enkawl command and control centre leh police enkawl emergency response support system-ah lutin duty-te hian eng lirthei nge tih te, a awmna, a tlan chak zawng, a tlanna lam, lirthei neitu (registration tih laia mi) leh mobile number-te a hre vek thei dawn a ni.

Transport department thawktute sawi Zirtawpni (August 9, 2024) thleng khan hetiang lirthei atanga call/signal (panic button) hi 542 an dawng tawh a. Mahse, heng an signal dawn zingah hian case liantham leh buaipui ngai a la awm lem lo niin ZALEN an hrilh a. An signal dawn tam ber hi naupangin an lo hmeh palh nia sawiin thil thar deuh a nih avangin mipui lam pawhin kan la hmang thiam lo nia an hriat thu an sawi bawk.

VLTS vuah kawngah lirthei thenkhatten harsatna an tawk nia sawi awm chu sawi fiahin Transport thawktute chuan lirthei siamtu company-ten hman bik (tie up) an neih zel avangin stock awm loh palh chang a awm thei tih an sawi a. Mahse, hetianga stock awm loh hi chu a awm khât hle niin an sawi a. Lirthei azirin vuah tur bik a awm avangin mahni thu thua online lama lo chah ve ngawt chu a chi loh niin an sawi bawk.

VLTS hi mihring phur chi lirthei-ah chuan vuah vek tur tih a ni chungin two wheeler taxi leh auto rickshaw-ah te chuan vuah ngei ngei a ngai a ni.

Vehicle Location Tracking & Emergency Alert System hi kum 2012-a Delhi bus pakhata hmeichhe pawngsualna rapthlak tak, ‘Nirbhaya case’ tia hriat lar thleng vanga sawrkar laipuiin lirtheia chuang, a bikin hmeichhiate himna atana hmalakna a ni a. Ministry of Road Transport & Highway chuan October 25, 2028 khan hriattirna chhuahin state tinte chu January 1, 2029 hnu lama public transport-ah chuan he khawl hi vuah vek turin a hriattir a. Mizoram bikah chuan he project kalpui nan hian vaiblechhe 10.4 vel ngai tura chhuat a ni a, a senso 90% hi sawrkar laipuiin a tum a, a bak 10% hi state tum ve tur a ni.