Aizawl July 11, 2024 : Congress Vigilance Cell chuan nimin khan Chief Minister Lalduhoma chu lehkha an thawn a, Mizoram Lokayukta kut phur sut turin an ngen a, an tih danglam te siamtha turin rawtna an siam bawk.

Congress chuan, "Kan ram rorelna a hlemhletna (corruption) do tura hmanraw pawimawh ber Mizoram Lokayukta hi kum 5 laia upa ni tawh mah se, hna thawk tak tak thei tura thuam a la ni lova. Mizoram Lokayukta thuam chak a ngaih thu leh chumi atana hma in lak tur thu pawh vawi duai lo mipui hmaah in intiam a. Amaherawhchu, vanduaithlak takin Chief Minister leh Minister-te pawh chhui thei tur Mizoram Lokayukta chu thuam chak aiin hnathawk tak tak thei lo turin a kut in phuar sak ta zawk a ni," an ti.

MPCC Vigilance Cell chuan, "The Mizoram Lokayukta (Amendment) Act, 2024 chu i kaihhruai ZPM sawrkar hmalaknain pass a ni a, hman turin Gazette Notification pawh March 15, 2024 ah chhuah a ni a. He Dan siam danglam (amendment) hmang hian Mizoram Lokayukta hi a pawimawhna tih hniam a, hna thawk tak tak thei lo tura siam mek a ni," tiin, Section 10 ti danglamin Inquiry Wing leh Prosecution Wing hotu lute dinhmun tih hniam a ni an ti.

"Section 11 tih danglamna (amendment) a Inquiry Wing leh Prosecution Wing hran siam hi thil tha leh tul a ni nain, Section 10 ti danglam a heng Wing hotu lute (Chief Inquiry Officer leh Public Prosecutor) te dinhmun (status) Additional Secretary level atanga Deputy Secretary level a tih hniam hian recruitment-ah harsatna a siam theih bakah hna a taka an thawh kawngah harsatna a siam dawn a ni.

Section 13 (3) hnuaia Proviso ti danglama "or any Other Authority/Organisation" tih belh a, prosecution chungchanga Lokayukta tana harsatna a siam sak a, Section 14 tih danglam chuan Mizoram Lokayukta pawimawhna a ti hniam an ti a. Mizoram Lokayukta-in Section 19 (5) leh Section 28 (1) hnuaia investigation chungchanga thuneihna a neih leh eng agency pawh inquiry ti tura a hman theihna chuan Lokayuta thuneihna a chhuh sak an ti bawk.

Section 22 (1) leh 22(2) a Section 17A of Prevention of Corruption Act, 1988 thun luh : Section 197 of Code of Criminal Procedure, 1973 leh Section 19 of Prevention of Corruption Act, 1988 hnuaiah hian public servant laka investigation/ inquiry tan hmain thuneitu (competent authority) phalna lak hmasak tur tih a ni a. Amaherawhchu Section 22 (1) of the Mizoram Lokayukta Act, 2014 hian State sawrkar phalna lak hmasak ngai lova investigation tih theihna Mizoram Lokayukta hnenah a pe a; Section 22 (2) hian chutiang inquiry zawha charge sheet a file pawh Special Court-in a pawm ang tih a ni.

Section 17A of PC Act, 1988 hi July 2018 a belh chauh a nih avanga Section 22 (1) leh 22 (2) ah he Section 17A hi tel lo chauh niin a lang. Chuvangin, Mizoram Lokayukta Act, 2014 in a tum dan ang taka State sawrkar phalna lak kher ngai lova Lokayukta-in inquiry a tih theih nan Section 17A of PC Act, 1988 hi Section 22(1) leh 22(2) of the Mizoram Lokayukta Act, 2014 ah thun lut turin an phutin an ngen a ni.

Congress chuan Mizoram Lokayukta hian sawrkara in nghat lova zalen tak leh hleih nei lo a hna a thawh theih nan a mamawh ang Officer leh staff pe vat tur leh, kum 2021 a State sawrkarin ACB atanga post 25 Mizoram Lokayukta-a transfer tura thutlukna a lo siam tawh hi a taka chantir nghal turin an ngen a. Lokayukta-in a mamawh dana heng transfer tur post-te hi her rem (re-designate etc) phal sak a, Lokayukta hi thuam chak mai theih a nih avangin hma la vat turin an ngen bawk a ni.

Mizoram Lokayukta-in a mamawh dana a ma puala officer leh staff a neih theih nan recruitment rules rang taka siam a, heng officer leh staff-te la tura Mizoram Lokayukta hnena thuneihna pe turin an ngen.