Aizawl August 14, 2023 : MPCC Media chuan Parliament-ah Manipur buaina chungchanga BJP kaihhruai NDA sorkar rintawk lohna (No-Confidence Motion) Assam MP Gaurav Gogoi-a putluh sawiho a nih khan Mizoram atanga MP 2 - C. Lalrosanga leh K. Vanlalvena te chuan NDA do zawngin Voice Vote an pe tih an sawi chu a finfiahna a awm lo niin an sawi.

Congress chuan, "PM Narendra Modi thusawi-ah Manipur buaina chinfelna lam hawi engmah a awm loh avanga eptu party intelkhawm I.N.D.I.A. atanga MP te’n Parliament an chhuahsan avangin Speaker in Voice Vote hmangin thutlukna a siam a. C. Lalrosanga pawhin  NDA thutna lama thu chungin, voice vote lak laiin sorkar rin tawk lohna motion a thlawp niin a insawi a. Hei hi video record hriat tur a awm lo a ni," an ti.

Congress chuan, "Lok Sabha MP C. Lalrosanga’n Central BJP kaihhruai NDA sorkar rin tawk lohna motion a thlawp tih thu hi ama sawi chauh mipuiin kan hria a, Citizenship Amendment Bill-ah Mizo mipui hnena a insawi loh dana a lo awm tawh avangin tuna a thil sawi pawh hi a ni ngei em tih rin a harsa hle a ni," an ti bawk.