State dang boxer ten Tata Yodha 4x4 LPS Professional Fight an ngaihven chho zel a, Assam leh Manipui atangin boxer pathum ten form an thehluh hnuah Meghalaya leh Karnataka atangin tel an rawn dil a, online hmanga form theh luh phalsak an ni.

LPS Pro fight-a tel tum hi inrinni thleng khan form theh lut tawh mi 161 an awm tawh a, an zingah Assam leh Manipur atanga khelh tum boxer pathum an awm tawh. Assam, Meghalaya leh Karnataka aṭangin online-a form theh lut an rawn dilna pawmsak a ni a, state danga boxer tam zawk a kang lai zel dawn niin an sawi.

Organising Committee chuan Mizoram chauh ni lovin a duh apiang tan tel theih turin a ruahman sa a, mahse, mahni insengso veka an khelh a ngai ve thung a, Dubai aṭanga khelh tumten an kalna leh thlenna tumsak an beiseina tihhlawhtlin theih a ni lo.

August 20 thleng tel tum tan form a theh luh theih a; August 31 aṭanga October 1 thleng R Dengṭhuama Indoor Stadium, Mualpui, Aizawlah khelh tura tih a ni a, semifinal aṭangin inhnek zawng zawng khawvel puma professional boxing record chhinchhiahna boxrec-ah ziah luh a ni ang.

India super lightweight number one Vanlalawmpuia leh super bantamweight number one F Zoramchhana'n tel an tum tih an sawi chiang tawh a, Mizo rawlthar boxer zinga beiseiawm bera ngaih, kum 19 mi Laldinsanga, Lunglei Ramthar chuan khelh ngei a tum tih a sawi bawk.

September 15 khian Khuangthing fighter Awpa'n Australia-ah chona thar hmachhawnin Australian boxer Ty Telford nen an inhnek dawn a, chuti chungin Pro Fight-ah tel hman a inbeisei. 

Organising committee chuan Pro Fight khel turte tawn hriat an neih dan azirin hlawm hnihah a thliar dawn a, boxing inelna hrang hranga hnuhma ṭha nei tawhten stage sang chin atang chauhin an khel dawn a ni.

Cherhlun tlangval Zotea'n November khian Thailand-ah Asian title chuh a tum ve thung a. Pro Fight champion a nih chuan semifinal aṭanga boxrec-a ziah luh tur a nih avangin, chak record vawi hnih neih belh hman ang a, inbuatsaihna tha tak a nih a beisei.

Pro Fight tharah hian weight panga tho ni mah se tel an tam thin loh avangin middle leh lifhtheavy paih a ni a, Mizo tamna feather leh welter telh ve thungin - fly, bantam leh light nen champion-in Rs 50,000 ṭheuh an dawng dawn a, lawmman pawisa fai Rs 5,50,000 sem chhuah a ni ang.

Final lut tan Rs 20,000, semifinal-a tla Rs 10,000 leh quarterfinal-a tla hnenah Rs 5,000 ṭheuh pek a ni dawn. Organising committee-in lawmman pawisa fai a sem chhuah bakah, KT Enterprise chuan boxer tha ber hnenah lawmman hlu tham tak a pe dawn a, boxer mi mal lawmman dang leh referee leh judge tha ber lawmman a tum vek dawn bawk.

Zanah vek inhnek huaihawt tura tih a ni a, inhnek zan apiangin GIG Motors Fighter of the Night lawmman tha tawk tak sem a ni ang a, RC Shirt House-in official-te thawmhnaw tumsakin official shirt sponsor a ni leh dawn a ni.