May 25, 2022; Mizoram Pollution Control Board (MPCB) chuan Mizoram hmun hrang hranga kawngpui laih hna thawktu, National Highways and Infrastructure Development Corporation Limited (NHIDCL) chu 'Show cause notice' an pe a, an hnathawh tihtawpsak an nih lohna tur chhan leh environmental compensation an thin lohna tur chhan sawifiah turin an hriattir.

MPCB member secretary C Lalduhawma hnen atanga ZALEN thudawn danin, MPCB in show cause notice a pek nachhan ber chu kawngpui laih hna an thawh a an leivung paih dan phung mumal loh vang a ni ber a, chumi chungchangah chuan MPCB in complaint pawh an lo dawng fo tawh thin.

Hemi chungchangah hian MPCB chuan NHIDCL chu an project awm dan leh an project len dan te MPCB ah submit turin vawi hnih an lo hriattir tawh a, chhanna erawh NHIDCL lam hian an pe ngai lo. "An hmalakna ah environmental clearance ngai niin kan hria a, an neilo niin kan hre si a, chumi vang chuan an project len zawng hriat a ngai a, mahse min chhang duh lo, central lam an nih avangin an ngeng ve deuh pawh a ni maithei..." MPCB member secretary chuan a ti.

MPCB member secretary chuan tun a show cause notice an pek chuan Mizoram hmun hrang hranga an hmalakna a huap vek tih sawiin, show cause notice an pek chu an hmu thuai turah an ngai tih a sawi. Vawiin May ni 25 atanga chhiar a ni 7 chhung ngei a insawifiah turin MPCB chuan NHIDCL an hriattir tih a sawi bawk.

NHIDCL hian Tuikhuahtlang, Aizawl ah office an nei a, tun dinhmun ah Mizoram hmun hrangah development work (kawngpui laih) hna an thawk a, chuta an leivung paih dan mumallo in nungcha leh thing leh mau nasa taka a tihchereu dan te, nasa tak a lui dung a tih bawlhlawh dan te chu, mi thahnemngai thenkhatten social media leh chanchinbu lamah an lo tarlang tawh thin a ni.