Mizoram Synod Choir chuan an music video pathumna tur - Aw Isu, Min kai Ang Che tih chu March ni 1, 2014 khian an tlangzarh dawn ta. Hla 11 awmna tur Aw Isu, Min Kai Ang Che music video album ah hian sap hla atanga lehlin hla 6 an dah dawn a, Mizo irawm chhuak hla 5 a awm bawk ang. A album hming putu 'Aw Isu, Min Kai Ang Che' tih hla hi Mizo Poet of the Century kan tih hial - Rokunga phuah a ni. An album zinga hla pakhat “Pathian Ang Chhungah” chu Part 8 zai kan tih ang hla niin, hetiang hla hi Mizote'n kan la sak tam vak loh hla a ni. He album ah hian Disc 2 a awm dawn a - Music Video DVD leh Data File Disc a awm dawn a. Music video-a hlate hi a MP3 in a awm anga, awlsam takin computer leh mobile phone-a dah nghal theih tur a ni. Aw Isu, Min Kai Ang Che album hi KTP General Conference, Khawzawlah an tlangzarh dawn a. A man pawh Rs. 160 chauh a ni ang.