Aizawl; Mizoram tharchhuah kuhva rahte state pawna phurh/hralh chhuah kawngah hun eng emaw chen harsatna a awm hnuin tun dinhmunah harsatna zualpui a ziaawm rih a, kuhva rahte state pawn (Assam)-ah phurhchhuah mek a ni a. Hetihlai hian Myanmar kuhva tawlh vengin Bilkhawthlirah chhun zan zawmin duty an la kalpui chhunzawm zel.

Bilkhawthlir Kuhva Chingtu Cooperative Society Ltd. hruaitute hnen atanga ZALEN thudawn danin Bilkhawthlir in kuhva an tharte chu state pawnah harsatna awm loin phurh chhuah mek a ni a, harsatna an tawhna thin, Lailapur gate-ah pawh an tlang thei a, kuhva chingtuten Bilkhawthlira Myanmar kuhva ro tawlh venga duty an kalpui pawh chhun zan zawm a chhunzawm zel la niin, duty awm lo se, harsatna an tawh leh mai rinna an nei.

Bilkhawthlirah hian eizawnna atana kuhva huan siam chhungkaw 800 bawr vel an awm a, kum 2021-ah Rs. nuai 850 vel an lei a, 2022-ah lei nuai 900-1,000 vel an inbeisei.

An kuhva, India variety chu an lo zo tan a, chungte chu a leitu hnam dangten state pawnah an phur chhuak nghal zel a, Assam variety erawh March-April vel atangin an lo ang.

Hachhek Bial Kuhva Chingtu Pawl (HBKCP) hruaitute pawhin an kuhva tharte chu a leitu hnam dang ten Vairengte leh Medili kaltlangin state pawnah an kalpui thei tawh niin an sawi a, Assam lamin pawisa an lo chawitirna gate thenkhat erawh a la awm nia an hriat thu an sawi.

Hachhek bial hian kuminah an kuhva thar atangin Rs. nuai 4,000 vel hmuh an inbeisei a, hetihlai hian Myanmar kuhva ro vanga harsatna nasa tak an tawh avangin, an beisei zat erawh pha lo turah an inngai a, Rs. nuai 2,000-3,000 bawr velah tlakhniam an inring.