Aizawl January 18, 2024: New Delhi-a cham mek Power & Electricity Department, Commerce & Industries leh Printing & Stationery Department changtu Minister F. Rodingliana chuan Mizoram mamawhte a thlen a, Mizoram thlai tharchhuahte hralhna turah buaina tur a awm loh tur thu an lo hrilh.

Commerce & Industries Minister F. Rodingliana chuan January 16, 2024 khan Dr. Arun Kumar Sarma, Director General, North East Centre for Technology Application & Reach (NECTAR) chu hmuin Mizoram thlai tharte lei leh hralh dan tur a sawipui a. Dr. Arun Kumar Sarma chuan Mizoram kuthnathawktute tharchhuah Sawhthing, Hmarcha leh Aieng te chu India ram chhung leh pawna hralhpui a inhuam thu lo hrilhin, a tam lamah harsatna a awm a rin loh thu a lo hrilh a ni.

P&E Minister F. Rodingliana chuan Vivek Kumar Dewangan IAS, Chairman & Managing Director, REC Limited pawh kawmin Modernization, Smart Metering leh Loss Reduction atana P&E Department-in DPR cheng vaibelchhe 806 hu an thehluh chu a taka tihlawhtlin a tulzia hrilhfiahin, Mizoram-in power za zela 33 (33%) chuang Transforming loss a neih thu leh Transfomer tam zawk za zela 72 (72%) lai chu kum 20 chuang a upa an nih tawh avangin a tihchangtlunna tur DPR an thehluh chu pawmsak ngei turin a ngen.

Vivek Kumar Dewangan IAS, Chairman & Managing Director, REC Limited chuan MP inthlan zawhah Minister thu thlente tihhlawhtlin ngei a tum thu a lo hrilh a. Un-Electrified village/inhabitants (eng la luh lohna khua) a eng lakluhna tur DPR cheng vaibelchhe 144 hu thehluh tawh pawh pek ngei a tum thu a sawi bawk.