Aizawl: Kum kal mek 2022-23 (April - December) chhungin Mizoram tlawhtu khualzin 1,64,048 an awm a, chung zinga mi 2,300-te chu ram pawn atanga kal (foreign tourist) an ni a. Kum 2009-2010 atanga chhiarin kumin, 2022-23 hi Mizoramin khualzin a neih tam ber kum a ni. 

Tourism department tar lan danin kum kal mek chhunga Mizoram tlawhtu khualzin tam berte chu ram chhung atanga kal (domestic tourist) an ni a, mi 1,61,748 an tling a. November, 2022-ah khualzin an tam ber a, 21,247-te chu ram chhung atanga kal niin, ram pawn atanga kal mi 380 an awm.

Kum 2009-2010 atanga tehin kum kal mek, 2022-23 hi kum la tluan lo mah se, khualzin Mizoram tlawhtu tam ber kum a ni tawh a, ram chhung leh ram pawn atanga Mizoram tlawhtu khualzin kalte pawh an tam ber kum a ni tawh.

Kum liam ta 2021-22 chhung khan Mizoram tlawhtu khualzin zawng zawng zat chu 1,32,616 an tling a, chung zinga mi 1,32,099-te chu ram chhung khualzin niin, mi dang 517-te chu ram pawn khualzin an ni.

Hetihlai hian Mizoram sawrkara tourism department-in a pawm ‘tour guide’ mi 89 an awm tawh a, chung mite chu khawpui bakah thingtlang hmun hrang hranga mite an ni.

Aizawl district-ah tourism department enkawl tourist lodge paruk awmin, Champhaiah pali, Hnahthialah pakhat, Khawzawlah pahnih, Kolasib-ah pathum, Lawngtlaiah pali, Lungleiah pahnih, Mamitah pasarih, Saitualah pahnih, Serchhipah pariat leh Siaha district-ah pathum a awm a, district hrang hrangah mi mal enkawl tourist lodge 27 a awm bawk.

Khualzin : Mizoram tlawhtu
Kum           Ram chhung    Ram pawn    Total
2018-19     88,122               1,644              89,766
2019-20    1,59,534             2,143              1,61,677
2020-21    20,474                90                  20,564
2021-22    1,32,099             517                1,32,616
2022-23    1,61,748             2,300             1,64,048