Chanmari Kawn (Waiting shed), Lalbuaia Shopping Complex (Zarkawt), Millennium Centre tualzawl (Atrium), Vanapa Hall kawt leh MFA Office, City Park-ah te ticket zawrhchhuah a ni a, a ni la la in cheng 200 man hralh zawh nghal a ni a, Inrinni chawhma lamah MFA Office-ah ticket hi hralhchhuah leh zui a ni a, chawhma lamah ticket a zo nghal vek a, lei tur a awm tawh lo. Tun tumah khual tha thleng tur MFA hian ruahmanna fel tak neiin thil an kalpui a, Lammuala inkhel en thei tur zah pawh bithliah vekin ticket an siam a, cheng 500 man chin phei chu seat nambar nen thlapa chhin-chhiah vek a ni a, 200 man atana an ruahman Tlang lamah pawh mipui tan en nuam tawk turin thil kalpui a ni a, 100 man-ah erawh tlemin a inbeng theih dawn. Cheng 500 man-ah hian seat 2000 a awm thei chungin Hoffenheim lam leh an mahni rawn zuitu crew hrang hrang te tan reserve siam a ni a, Cheng 200 man hi ticket 1000 siam niin Cheng 100 man hi ticket 3500 siam a ni thung a, heng ticket hi ni hnih pawh tling lovah hralh zawh nghal a ni a, lei tum chang ta lo beidawng pawh an tam hle. Inkhelh en tum an tam a, Lammual-in a zo ngang si lo, in ek bengna chi boruak a ni lo a, hei vang hian MFA lam chuan ticket nei lo te chu Lammual lam pan lo mai turin an ngen a, thil a felfai zawk theih nan hriatthiam-na an ngen tih an sawi. Inkhel en tur te pawh mahni luhna tur lam gate-ah lut theuh turin an ngen a, May 13, 2014 Thawhlehni zan dar 6:30-ah chuan inkhel en tum te chu an thutna hmuna thu vek turin an ngen a, dar 7:00 atangin programme tan a ni dawn a, dar 8:00-ah chiah inkhelh hi tan tur a ni. Security a fel fai zawk nan ticket nei te chuan he ngenna hi zawm hram turin an chah a ni. TV lamah pawh en theih dawn Inkhel hi Doordarshan leh Zonet cable te chuan Live in an tichhuak dawn a, Doordarshan hian Delhi atangin Zonet cable satelite hmanginLive-in an pechhawng dawn bawk a, khawvel pum atanga en tur a nih dawn avangin commentry pawh Sap tawnga tih a ni ang. Ticket nei lo dan pawh duhthusamin TV lam atanga a en theih dawn avangin Lammual-ah hian ticket nei lo te chu luh lui tum lo hram turin ngen an ni.