Music video lamah pawh kan hmu leh zut tawh a. Lam lama tui tak tak thalai nalh tak tak an awm tam tih pawh a hriat. Lam lama tui te tan Dance Camp buatsaih a ni dawn. Mizorama a vawi khatna tur a ni hial ang! June thla chhungin camp hi buatsaih tum a ni a, dance style chi hrang hrang he’ng — Contemporary Ballet, Jazz leh hip hop style leh a dang dang pawh a awm dawn a. Duh ber style thlan emaw, a chikim paw’n a zir theih dawn ang. He camp-ah hian naupang tan pawh zir theih a ni ang a. Kum 5-12 ni lai mek te tan bakah, kum 13-60 chin pawhin an duh chuan an zir thei ang. Group hnihna then niin, ‘Naupang’ tih leh ‘Puitling’ tiin an then hrang thliah a ni. Mizoram a vawikhatna tur he Dance Camp-ah hian nitin class hran hran a awm dawn a. Sikul naupang te pawh chhun lama an zirna ti buai lo zawngin hun siamrem a ni anga, college zirlai te chawlh hun lai leh office kal lai te ban hunah te class neih theih turin ruahmanna siam a ni. Hip hop hnuaiah hian style hran hran te hi an zirtir bawk dawn a ni. Chu’ng zingah chuan B-boying-Kim Mugen, lyrical hip hop-Ben Lefty Hnamte, girls hip hop-Priscilla Hmar leh commercial hip hop te a awm dawn a. Special class a awm dawn bawk. Chu’ngte chu 'B-boying & Acrobatics'-Dr. Reuben Azl, 'Street funk with heels'-William Paris leh 'Animation'-Marcus Dyndyna te an ni. Jazz puitling category tan bik hian Latin jazz, salsa rawngkai zirtir tel a ni ang. Partner nena lam zir duh tan remchang tak a ni!