ZALEN, July 20, 2026: Mizoramin cricket khelmual a neih chhun, Suaka Cricket Ground (SCG) chu India-a inelna lian thleng thei tura buatsaih mek zel a ni a. BCCI Chief Curator Ashish Bowmik-a kaihhruaina hnuaia ruahmanna siam angin hma lak mek a ni.

Cricket Association of Mizoram (CAM) chuan an khelmual neih chhun hi tha lehzuala buatsaihna leh Board of Control for Cricket in India (BCCI)-in mipa inelna a buatsaih thenkhatte an mual ngeia an khelh ve theih nan theihtawp an chhuah mek tih an sawi.

Sihhmuia khelmual hi a ball khelhna lai bik, pitch pakua awm leh a bula practice pitch-te chei that hna a ni a. Khelmual bakah inelna lian thlen theih nan a tul leh mamawh dangte pawh buaipui a ni bawk.

CAM hian BCCI mi thiamte pawh rawnin BCCI Chief Curator Bowmik-a’n a enpui a, Assam atangin picth atana hman chi bik lei lak niin truck lian trip hnih (ton 70) lak hmangin thawm that a ni.

Khelmual laia pitch number 4, 5 & 6-te chu BCCI tournament khelhna tura ruahman niin pitch number 1, 2, 3, 7, 8 & 9 te chu CAM-in inelna a buatsaih khelhna atana ruahman a ni thung a. Pitch-te hi inches hniha chhahin a leite thlak vek a ni a, a khuhna turin GSM pitch cover (feet 50 x 100) pathum lei thara khuh a ni bawk.

Hnathawh mekah hian thawktu 24-ten ni 15 chhung an buaipui a, hnim (grass) phun zawh tawh niin tha taka a to theih nan uluk leh fimkhur taka vil leh enkawl mek a ni. 

Peih fel a nih hnuah BCCI inelna thleng tur hian a tha tawk em tih chu BCCI technical team leh management team-in a hran ve vein an endik leh dawn a ni.

CAM hian 2025-26 season-ah sum hmanna tur leh hman tur Rs. 28,50,00,000 (cheng nuai 2,850) an ruahman zinga a zahve aia tam, Rs. 15,85,24,000 chu Mizoram hmun hrang hranga khelmual an neih leh an sak mek cheibawla sak chhunzawm nan leh tuaihnum nan an dah a. SCG tan bik Rs. 50,00,000 ruahmanin pavillion building thar, hostel leh club sak nan bakah khelmual enkawl zuina atan tih a ni.

Sihhmuia khelmual hi a hmun petu, Lal Rotluanga pa hming chawiin a hming hi puttir a ni a. Kum 2010 khan a sakna tur lung phum niin DoNER ministry atanga Rs Vbc 11 hmuh hmanga bul tan a ni a, inkhelh theihna peih a nih hnuah May 23, 2014 khan CAM kutah hlan a ni a, tun thlengin a tihchangtlun hna hi thawh reng a la ni.