Aizawl: Mizoram chhunga kohhran hrang hrang te chuan missionary 4147 an chawm mek a, heng zingah hian Mizoram Synod chuan an chawm tam ber a ni.

Tun hnaia tihchhuah 'Statistical handbook Mizoram 2020' a tarlan danin Mizorama kohhran lian ber Presbyterian Church of India, Mizoram Synod chuan missionary 2021 chawmin an chawm tam ber a, hei hi Mizorama kohhran ten missionary an chawm zatve deuh thaw niin missionary chawm zawng zawng atanga chhutin 48.73% a tling a ni. Baptist Church of Mizoram chu a dawttu niin missionary 1001 an chawm a, Evangilical Church of Maraland in 330, Salvation Army in 307, UPC (NEI) in 211, UPC (Mizoram) in 143, Lairam Isua Krista Baptist Kohhran in 96, Isua Krista Kohhran in 22 leh Seventh Day Adventist in 16 te an chawm mek a. Hetih lai hian Roman Catholic chuan missionary chawm an nei lo thung.

Mizorama kohhran zingah pawh Presbyterian chu kohhran mipui ngah ber a ni a, member 620,311 neiin Mizorama kohhran hrang hrang member awm zat 11,34,645 atanga chhutin 54.67% a tling a ni. Baptist Church of Mizoram chu member ngah ber dawttu niin 169,748 a nei a, UPC (NEI) chu pathumna niin 83,368 an nei a ni. Kohhran dang te member neih zat chu UPC (Mizoram) 69,467, Salvation Army 63,155, Evangilical Church of Maraland 45,665, Lairam Isua Krista Baptist Kohhran 30,803, Roman Catholic 24,570, Seventh Day Adventist 16,723 leh Isua Krista Kohhran 10,835 te an ni. Mizorama kohhran hrang hrang ten thawktu (workers) a nghet leh nghet lo an neih belhkhawm chu 6,575 an tling a ni.