ZALEN August 17, 2026: ZPM chuan vawiin khan Party Office-ah chhung inkhawm an hmang a, thusawitu AH&Vety Minister C. Lalsawivunga chuan, “Mizoram hi Sa, Artui leh Bawnghnuteah kan la intodelh lo em em a, kan intodelh theihna turin sawrkar chuan hma a la mek. Kan intodelh theihna tura pawimawh ranchaw chinna hmun pawh siamin bul tan chhoh mek a ni a, Mizorama a vawikhat nan Animal Insurance-te pawh kalpui mek a ni,” a ti.

C. Lalsawivunga chuan, “Mizoram hi sa leh artuiah kan la intodelh loh avangin hma kan la mawlh mawlh mek a, Artuia kan intodelh ve theih nan Meka Egg Production Firm, Arpui 1,00,000 vulh theihna turin Thenzawla AH& Vety Complex-ah din turin hmalak mek a ni a, he project atang hian nitin Artui tharlam 70,000 atanga 75,000 tharchhuah theih beisei a ni a, Crore 20.63 senna tur project a ni,” a ti. 

AH & Vety Minister chuan, "ASF avanga kan harsatna nasa tak kan tawh sutkianna turin Animal Insurance/Livestock Insurance tha tak, Chief Minister hmalaknain kan nei tawh a, hei hi state history-a la thleng ngai lo a ni. Kumin February atang khan Animal Insurance hi hman tan a ni a, August 11,2026 thlenga Vawk, Bawng leh Kel Insurance tih zat chu 4,724 a ni a, dilna lut pek tawh 219 awmin heta tanga sum pekchhuah tawh zat chu cheng nuai 41.10 a ni,” a ti.

Sawivunga chuan, “Ranchaw siamna tur atan hand holding hnuaiah Pilot Project kalpui mek a ni a, Vaimim leh Bekang chin pawlh (contract farming) kalpui niin Champhai leh Khawzawl district-a khaw 11-ah hmalak mek a ni. Hei pawh hi Mizorama a vawikhatna a ni a, he project-ah hian farmers 529-ten vaimim leh bekang an ching a, vaimin chi Kg 4428 leh bekang chi Kg 2184 semchhuah tawh a ni bawk. Bawnghnuate, artui leh sa-ah kan intodelhna turin ranchaw siamchhuah tam a ngai a, hmalak chhoh mek niin Thenzawla Vety Farm-ah Nuai 211 sengin hmalak chhoh mek a ni a, Hnahlan-ah Nuai 62 sengin hmalak tura ruahman peih a ni tawh bawk. Hortoki-ah ranchaw chinna hmunpui tur ruahmanna kalpui mek a ni bawk,” a ti. 

C.Lalsawivunga chuan, “ZPM hi party naupang tak niin bul tan a nih atangin policy mumal tak leh inkaihruaina awmze nei taka inrelbawl leh party thangduang tak a ni a, hruaitu tha tak nei, vision nei tha bawk si nei kan ni. Hemi avang hian ram mipuite pawhin sawrkarna min pe a. Chief Minister Lalduhoma kaihhruai ZPM Ministry chuan flagship programme kan neih chu kum khat tlin hmain kan kalpui thei nghal a, Mizoramah hetiang ti thei awm chhun sawrkar kan ni. He sawrkarah hian kan state-a la thleng ngai lo hmasawnna engemawzat a awm tawh a, Pathian malsawmna he sawrkar hian a dawng nasa em em a ni.

"Mizoram sawrkarin Notified crop a thlan atangin sawhthing, aieng leh hmarcha chingtu nasa takin an pung a, buaipui em em ngai lova aieng leh hmarcha te kan hralh thei zel hi a lawmawm. Sawhthing bikah hian a pulung ringawta hralh zawh sen a ni dawn lo tih hriain processing lam buaipui a ngai a. Horticulture Centre Sairang-ah bana kaih hruaia kan progress partner MS Goodfaith te chuan sawhthing sawbawl hna kalpuipuiin May 19, 2026 khan Slice Dry Ginger matric ton 5.4 lai a vawikhatna atan hralhchhuah a ni tawh a ni. Sawhthing chingtuten an sawhthing awlsam taka an zailepna tur Mizopa siam khawl 60 pekchhuah tawh a ni. Sawhthing tihrona tur tapchhak technology engemawzat lei tura inruahman mek a ni bawk a, hengte pawh hi Mizorama la awm ngai lo thil vek a ni."

"Sawhthing chin dan tur leh kalphung pawh ruahmanna fel taka neih a ni a, tuna kan sawhthing chin dan ni lo, lei ti chhe lo zawnga chin dan leh chemical tel lo, organic farming kalpui tura hmalak mek a ni bawk. DoNER Ministry lamah hmalakna a kal mek a, Sustainable cultivation and post harvest management of Mizo Ginger chu kalpui niin hemi atan cheng vaibelchhe 30.13 min pe a, bul tanna atan DoNER Minister-in a thlan Champhai district-ah Processing hub atan Mualkawi, Spokes atan Vaphai, Zotlang leh Tualcheng te thlan an ni tawh. He sawrkar, kalphung thar hian ram mipuite tan theihtawp a chhuah reng a, chutiang mi kan nih avangin ZPM-ah chuan dawt a leng ve tur a ni lova, dawt hi a tlo lo a, thudik tak hmangin politics kan khel tur a ni. Hetiang zela kan kal chuan ram mipui pawhin kum 2028-ah sawrkarna siam turin kan kutah mawhphurhna a dah leh ngei ang,” a ti bawk.