Manchester United Supporters’ Club, Mizoram (MUSC - Mizoram) chuan an din champha vawi lina pualin Ningani khan Civil Hospital, Aizawlah thisen unit 64 an pe.

Mizorama Premier League club hlawhtling ber, vawi 13 zet champion thei tantute hi blood bank-ah thisen pek hi an huaihawt a, pek tuma kal an member mi 87 zinga mi 64-in an pe a ni.

MUSC - Mizoram hian tun hma pawhin thisen pek an lo huaihawt tawh thin.

Kum 2019-a din supporters’ club hruaitute chuan club-ah hian member sang chuang an inziak lut niin ZALEN an hrilh a. An din tirh lam kha chuan chuan thawhpui neiin an member-te hian identity card hmangin an club tan ber jersey pawh man tlawm zawkin an lei thei thin niin an sawi.

MUSC din tur hi thil awlsam a ni lo va, Mizorama din tur pawh hian season tin Manchester United hmunpuiah member 30 tal an neih a ngai a, member ni tur hian mi pakhat tan Rs 5,000 vel sen a ngai thin a, member-te hian key chain, T-shirt leh thil dang an dawng thin thung.