Aizawl January 21, 2024 : New Delhi-a cham mek, Mizoram Legislative Assembly Speaker Lalbiakzama chuan Zirtawpni khan National Disaster Management Authority (NDMA) member Krishna S. Vatsa chu NDMA Bhavan, Safdarjung Enclave-a a Office-ah hmuin a kawm.

An inkawmnaah hian chhiatrupna thleng thei laka Mizoram a lo invenlawk theih dan tur bakah chhiatrupna thlengin nghawng nasa zawk a thlen theihte tihnep a nih theih dan (preparedness & mitigation) chungchanga thil pawimawh hrang hrangte an sawi dun a ni.

Speaker chuan Vatsa chu Mizoram dinhmun a taka hmuhpui turin a sawm a. Speaker sawmna angin kumin furpui hma ngeia Mizoram tlawha zin a tum thu a sawi a, Mizoram dinhmun dik tak leh Mizoram tana thil tha zawk tur nia a hriatte chu a hmun ngeia enhova kawhhmuh a inhuam thu a sawi bawk.

NDMA member Vatsa chuan National Earthquake Risk Mitigation Project (NERMP), Forest Fire Management Programme (FRMP) leh State Disaster Management Fund (SDMF) atangtein fund thahnem tak pek a inhuam thu speaker hi a lo hrilh a. Inrelbawl dan kalphung erawh a duhkhawp loh thu sawiin, insiamrem hmasak ngai nia a hriat thu a hrilh bawk.

Speaker hi Alexander V. Chongthu, Addl. Resident Commissioner, Mizoram House, New Delhi leh Rosangliana Chhakchhuak, Committee Officer, Mizoram Legislative Assembly Secretariat ten an tawiawm a ni.