Aizawl September 11, 2023 : May 31, 2024 hian No Tobacco Day denchhen in Zirna In zawng zawngte "Tobacco Free Educational Institution" a puang turin Ministry of Health & Family Welfare chuan State te a ti a. Vawiin khan Mizoram State Anti-Tobacco Day puala School Education Directorate conference hall a hun hman naah Mizoram chhunga zirna in hrang hranga zirtirtute tan "Training of Teachers in ToFEI (Tobacco Free Educational Institution)" buatsaih a ni.

Kum 2014 atang khan Mizoram State Anti-Tobacco Day hi September ni 11 ah kumtin thu thlan bik (Theme) neiin hman chhoh tan a ni a. Kuminah pawh hian thu thlan bik "Towards 100% Tobacco Free Educational Institution" tih hmanga hun hman a ni.

He hunah hian Ministry lamin a rawn phut angin engtinnge Mizoram chhunga Zirna In hrang hrangte chu Tobacco Free Educational Institution a nih theih ang tih chu inkaihhruaina (Guidelines) an rawn duan sa hmangin zirhona hun neih a ni. Higher & Technical Education hote nen pawh meeting lo neih tawh niin, department pahnih hnuaia Zirna in hrang hrangten sawrkar thu lo chhuah tawh te lo zawm a, 100% a Tobacco Free Educational Institution a Mizoram a inpuan theih ngeina turin mawhphurtuten hma lo la chhunzawm zel turin an ngen a ni.

Vawiin inkhawmah hian Zirna In-a Principal te leh Association hrang hrangte bakah Education Department a hotu hrang hrangte an tel a. National Tobacco Control Programme, National Health Mission, Mizoram leh School Education Department tangrual a buatsaih a ni.