Aizawl: Asia khawchhak lama Vawk natna leng mek African Swine Fever chuan Mizoram a la thleng lo nia hriat a ni a, thenawm Myanmar-ah he natna hi hmuh a nih tawh avangin Mizoram pawh he natna hi thleng thei reng a ni tih AH&Vety thawktute chuan an sawi.

AH&Vety department thawktu te chuan Myanmar-a Shan state ah African Swine Fever vei vawk hmuh an nih avangin Mizoram tan fimkhur a ngai hle tih Zalen palai an hrilh a. Myanmar nena inkalpawh na hmun Champhai, Sangau leh Siaha lamah te uluk lehzualin beng an chhi tih sawiin hetih lai hian he natna vei tak hi chu hmuh an la nei lo niin an sawi. Vety thawktu te chuan African Swine Fever chu a hlauhawm em avangin ramdang atanga vawk lakluh chu khap bur an duh a, a ruka vawk la lut an awm a nih pawhin an vawk chu tihhlum nghal zel nise an duh hle tih sawiin Mizoramah he natna hi a taidarh chuan kan tuar hle dawn niin an sawi bawk. Myanmar ram, Shan state-ah hian August 14, 2019 khan vawk 65 chuan ASF an vei tih finfiah a nih hnuah tih-hlum nghal an ni.

African Swine Fever chu vawk mai ni lo, mihring pawhin an pu darh thei nia sawiin fimkhur a ngai hle tih an sawi a. Vawk hrileng a awmin vawk suat turin central-in compensation a pek theih a tlem em avang-in hmalak a harsa tih an sawi a, central norms ang chuan zangnadawmna hi vawkte-ah Rs. 250, thla 6 chinah Rs. 500 leh vawk puitlingah Rs. 1000 te an ni.