Aizawl : India ram hmun hrang hranga buaipui mek Mucormycosis natna, Black fungus ti a sawi chuan tun thlengin Mizoram-ah chuan Covid-19 natna vei emaw, dam tawh emaw, damlo dang te he natna kai hi an la awm lo niin ZALEN chuan thu a dawng.

Mizorama Covid-19 enkawlna tura hman Zoram Medical College (ZMC) lam chuan hetiang natna kai hi an la neih loh thu leh an damlo chhuak tawh te atangin he Black Fungus kai report an la awm loh thu ZMC Director, Dr. John Zohmingthanga chuan ZALEN a hrilh. Damdawi in thianghlim leh thianghlim loh leh ventilator thianghlim tawk lo awm anga sawi chungchangah Dr. John-a chuan, "Pawn lam atang hian  a chhunga mi ten kan hriat loh hi an lo hre thin a. Covid-19 natna bikah phei chuan ventilator chu sawi loh, khum leh room chhung pawh hi tih uluk taka fai vek zel a ni, tihfai loh chuan ventilator te hi hman zui a ni ngai lo," a ti.

Mucormycosis natna chungchangah hian ENT Specialist, Dr. Lalhmachhuana Hmar chuan he natna hi natna thar lam a nih loh thu leh COVID-19 len hma pawhin he natna hi hriat a ni fo tawh tih a sawi a. "Taksa chak lo, thisen sang, steroid hmang hrep tawh, taksa peng thlak tawh te ah a lang awlsam a, he natna hian kan chhehvelah min hual reng a, damlo hi hrisel pangngai an nih chuan zai a, enkawl dam mai theih a ni," tiin, "Mizoramah pawh tunhma lamin he natna hi kan hre tawh thin a. Tun dinhmunah hi chuan he natna in a tihbuai an awm thawm kan la hre rih lo," tiin ZALEN a hrilh ve bawk.

State nodal officer, Integrated Disease Surveillance Programme Dr. Pachuau Lalmalsawma pawhin Mucormycosis natna chungchangah hian report an la dawn loh thu a sawi a, district hrang hrangah pawh he natna vei hriat an la awm loh thu ZALEN a hrilh.

Black fungus tia tunlaia kan hriat lar chhoh mek 'Mucormycosis' hi natna hrik hmanga kai a ni a, heng natna hrik (fungi) te hian nitin kan velah min chamchilh reng a. Lei (soil) ah te, lei tha (manure) ah te, thil tawihah te tam tak an awm a. Mihring hrisel pangngaiah natna an thlen lem lo. Amaherawhchu, taksa natna dotu a lo chauh khan, heng natna hrikte hi kan taksa ah lutin, natna na tak an thlen thin a. A hun taka enkawl anih loh chuan, thihpui awlsam tak natna a ni. Zunthlum control tha lo te, Steroid hmang nasa te, Cancer-te, taksa bung hrang thlak (transplant patient) te, kâng leh hliampui  tuar te, damdawi hmang sualho (IDU) te hian an vei awl bika sawi a ni.

Tun hnaiah Black Fungus bakah Yellow fungus chu hmuchhuah leh niin, heng natna te hian India ram state hrang hrang a tibuai hle a, Yellow fungus phei hi chu Covid-19 vei lem lo kai an tam hle.