Aizawl: Mizorama Covid 19 positive tihdam zat chu 67% a ni a, Mizoram ah Covid 19 positive mi 1062 hmuh tawh a niin dam tawh 713 leh vei mek 349- an la awm.

Zirtawpni khan Mizoram ah Covid-19 positive 16 hmuh chhuah an ni a, heng positive hmuh thar 16 hi ZMC Laboratory a RT-PCR hmanga hmuh vek a ni a, Rapid Antigen Test leh Lunglei Civil Hospital TrueNat hmanga hmuh an awm lo thung. ZMC Laboratory a positive hmuh thar te hi Siaha district mi mipa 2, kum 30 mi leh kum 4 mi, quarantine facility a awm, state pawn atanga lo haw, symptoms nei lo an ni.

Lunglei district a awm BSF 1, state pawn atanga lo kir, quarantine facility a awm lai symptoms nei lo a awm bawk a. Mamit district mi mipa 2 leh hmeichhia 1, kum 20-34 inkar, state pawn atanga lo haw quarantine facility a awm mek, symptoms nei lo an ni bawk.

Aizawl district mi positive 10 zinga 9 chu state pawn atanga lo kir, quarantine facilty a awm, symptoms nei lo, kum 18-54 inkar mipa vek an ni a, Assam Rifles sipai 1 bak chu civil mi vek an ni a; Aizawl district a positive hmuh zinga 1 chu Zemabawk veng mipa kum 54 mi, symptoms nei, travel history nei lo, a kaina tur awm hriat loh a ni.