Aizawl November 3, 2022 : India ram leh khawvel puma natna hluar mek, thosi seh atanga kai theih Dengue natna thihpui Mizoramah mi pahnih an awm tawh a, India ramah 2022-ah mi 44 in nunna an chan phah tawh a ni.

Dengue natna hi 2019 atanga hriat chhuah tan kha niin, Hemi kum hian Mizoram-ah positive mi 131 hmuhchhuah a ni a, 2020 khan mi 67 ten an vei leh a, 2021 khan vei mi 83 hmuchhuah leh niin, kumin January- October chhung khan  positive 437 hmuchhuah leh an ni. Kum dangah hi chuan Dengue natna hi thihpui an awm lo a, kumina hian mi pahnihin thihpui tawhin October-a thi ve ve an ni.

India ramah 2019 khan positive mi 157315 chhinchhiah a ni a, mi 166-in an thihpui, 2020 khan vei mi 39419 hmuchhuah niin mi 56 in an thihpui leh a, 2021 kha vei hmuchhuah an tam ber tum niin vei mi 193245 hmuh a ni a, hemi kum hi thihpui an tam ber tum niin mi 346-in nunna an chan phah a, 2022 (Jan – Sept) inkara mi 63280 ten an kai tih hriatchhuah niin, nunna chan hi mi 44 an ni.

2022-ah hian April thla tih lovah chuan Mizoram-ah Dengue vei hmuchhuah ziah a ni a, May khan pakhat hmuchhuah niin, March-ah pali, January-ah paruk leh February-ah pasarih hmuchhuah a ni. Thla dangah chuan hmuchhuah hi 10 an chuang ziah a, September kha hmuhchhuah tam ber thla niin, 156 vei hmuh a ni a, October-ah khan 143 hmuh leh niin, hemi thla hian mi pahnih in an thihpui.