Aizawl: Mizoram Police (CID)-te chuan kum 2009 atanga kumin May thla tawp thleng khan Information Technology Act,2000 (IT Act) tlawh chhanin Mizoram chhungah Cyber Crime kaihhnawih thubuai 100 an ziak lut tawh a. Kumin bikah hian thubuai 4 ziah luh tawh a ni a, kum dang nena tehkhin chuan thubuai theh luh zat hi a sang nghal viau niin a lang.

Heng thubuai thehluh zingah hian Aizawl district chhunga theh luh a tam ber a. Thubuai tam zawk hi social media atanga thu/thlalak thehdarh avanga complaint a ni tlangpui niin CID hotute chuan an sawi a. IT Act (2000) hnuaiah ‘sms hmanga mi pawisawi’ (section 66A) bawhchhiatna thubuai tam berin, midang lemchan (section 66 D) thubuaiin a dawt a, zahmawh rawngkai milem/thu inthawnte chu thubuai langsar zualte an ni.

Kum 2009 atanga 2018 August thleng bika thubuai thehluh 73 zingah hian tuartu mi 77 an awm a. Heng thubuaia a tuartute hi a tam zawk chu hmeichhia an ni a. Tuartu hmeichhia hi 54 lai an awm a, chutih laiin mipa tuartu hi 23 an awm ve bawk.

Mizoram Population nena chhutin kan thubuai neih zat hi a sang viau a, tihniam tur hian Mizoram Police –a CID hotute chuan tunaia chak zawka hmalak dan tur an ngaihtuah mek thu sawiin, Ministry of Home Affairs-ina a hmalakna thar Cyber Crime Reporting Portal -Cyber Crime kaihhnawih thubuai, internet atanga awlsam taka theh luh mai theihna tur - buaipui mek pawh tun atanga thla hnih vela peih fel a nih an beisei thu an sawi.