ZALEN, August 20, 2025: Mahindra & Mahindra chuan XUV 3OO tuai tharin April 2025 khan XUV 3XO tih hming puin a pho chhuak a, May 2025 atangin India ramah an hralh chhuak.

Mahindra-in SUV a neih zinga a hralh hnem ber dawttu ni zuiin April, 2024 atanga March, 2025 chhungin 1,00,905 an hralh hman a. Hmasawn leh zual turin XUV 3XO awm sa bakah variant dang, REVX an tichhuak leh a ni.

Mizorama Mahindra full range dealer, Mana Motors chuan Nilaini khan an showroom, Bawngkawn, Aizawlah XUV 3XO REVX tlang zarhin, Dealer Principal Dr Franklin Lalrinngheta leh a nupui, Lalawmpuii’n an khung hawng a, chi hrang pathum awmin Rs nuai 8.9 atanga nuai 12.9 man a awm.

Dr Franklin-a chuan, “Car thar hlak a ni lo va, XUV 3XO kha kawr thar an haktir a, a pawn leh chhungah danglam hret hret a awm a, petrol engine hmang veka siam a ni. Turbo direct injection hmang a ni a, a man atanga ngaihtuahin Mizoram kawng chhuk chhovah a chak tha hlein ka hria,” a ti.

Kawng hrang hrangah XUV 3XO pangngai aia mipui hip zawk tura duan a ni a, tunlai thiamna thar ber, ADAS level 2 nena thuam a nih bakah, engine TCMPFI 1.2L, 110bh@200nm torque leh TGDI 1.2L, 130bhp@230nm torque pe chhuak thei a hmang.

Mana Motors hian Mahindra siam chauh ni lovin car hlui hrang hrang a tharin an thleng thei a, a bikin XUV 3XO REVX a lo chhuah tak avangin XUV 3OO leh XUV 3XO pangngai neite tan thleng theihin kawng a hawng zau leh zual.

An sumdawnna tihlen zel nan leh mipui tana an inhman chhuahna ni pah fawmin LPS Vision an thawhpui mek a, August 5 atang khan tunlaia show hriat hlawh tak, Mahindra XUV 3XO Mizo Talent tan a ni a, August 30-a zawh tur niin Ningani zanah Top 10 intihsiakna neih a ni ang.