Mana Motors chuan an hnenah mi 50-in lei tumin Scorpio thar an hauh lawk tih an sawi a, inrinniah an showroom, Bawngkawnah Aizawl District Transport Officer Pu H Lalhmingliana'n a tlangzarh.

2002 khan Mahindra-in Scorpio a tichhuak a, India rama Sports Utility Vehicle (SUV) zinga hralh kal leh fak hlawh a ni. Mizorama Mahindra full range dealer an nih hnuah Mana Motors-in 2014 atangin 1,171 an hralh chhuak.

Pu Hminghlua chuan, "India siamah a aia lirthei ṭha ka la khalh lo. Rs nuai 30 chuang man neih a ngaiin ka hre lo. Tunah an rawn tuai thar a, a man tlawmin a chak si a, khawl tha leh changkang tam tak a keng tel a, company-in an hloh lo maw ka ti hial a ni," a ti.

Dealer Principal Dr Franklin Lalrinngheta te nupa, Miss India Mizoram Lalramhlui Sailo te nen Mizorama zawrh chhuah turin Scorpio-N an khuh hawng a, petrol leh diesel engine awm ve vein a man tlawm ber Rs nuai 11.9 (ex-showroom price) a ni.

Pu Hminghlua chuan, "India ramah (ama milpui atanga tehin) a tluk pha tur SUV-ah a awm lo niin ka hria a, a lei phak tan lirthei tha ber pawl a ni," a ti.

Mizoram dealer fak bawkin, "Mana Motors-in full range dealership an chan atangin Mahindra lirthei leh part lei a awlsam phah a, dealer tha leh rin tlak an ni bawk a, Mizoram tan malsawmna an ni," a ti.
Dealer Principal Dr Marina chuan Scorpio chu Mahindra-in lirthei a siam chhuah zinga chhuanvawr leh langsar a nih thu a sawi bawk a, tuna mi hi a hma aiin a sei a, a zauin a hlai zawk a, a chhung pawh a changkang zawk a, fei fai zawka duan chhuah a nih thu a sawi.

Scorpio thar hi Italian design company lar tak Pininfarina-in an duan a ni a, SUV C segment bikah tha chung chuang hle tura ngaih a nih bakah hemi chung D segment thlenga pawl pha hiala sawi  a ni a, 'Big Daddy of SUV' an ti hual a ni.

SCORPIO-N
* Diesel engine - Mhawk 2.2 Litre, 175ps, 400Nm torque; Petrol engine - Mstallion 2.0 litre, 203ps, 370Nm torque.
* A sei zawng : feet 15.2, a zau zawng : feet 6.2, a san zawng : feet 6
* Airbag 6, disc brake vek, kawng hnawngah brak buai lo turin brake wiping a keng tel
* A then nasa titlem turin pentalic suspension a hmang.
* Chho laklawha din a ngaih pawhin awlsam taka tlan leh thei mai tura siam a ni.
* 4x4 a nih bakah 4 explore a nei a, a tlanna kawng a zira duhthlan tur chi li a awm a ni.
* A man : Rs nuai 11.9 (ex-showroom price) atangin a in tan.