May 24, 2023; Mizorama ramngaw te a tlahniam zel a, hei hi a chhan ber chu tlang ram lo neih leh hmasawnna hrang hrang thawh vang a ni. 

Mizoram a ramngaw zau zawng hi India State of Forest Report (ISFR), 2021 in a tarlan danin 17,820 sq.km a ni. Mizoram zau zawng atang hian 84.53% a ni.

Mizorama ramngaw zau zawng leh percentage te hi India State of Forest Report (ISFR), 2021 in a tarlan atanga lak a ni a. He report hi kum khat dan a siam thin a ni. 

He report-ah hian Forest Department ram chauh ni lo, ramngaw hrim hrim - Revenue, mimal, khawtlang leh Village Council ramte pawh satellite atanga an lan dan bakah a taka an enfiah hnu a ramngaw tling pha chin chu chhiar tel vek an ni.

Kum 2019 report nen khaikhin in Mizorama ramngaw te hi a tlahniam zel a, hei hi a chhan ber chu tlang ram lo neih leh hmasawnna hrang hrang thawh vang a ni. 

Ramngaw tlak hniam dan chu hetiang a ni, kum 2019 ah sq.km 18,005.51 (85.41%), kum 2021 sq. km 17,820 (84.53%).

Ramngaw (Forest Cover) hi zau viauin lang mahse ramngaw chhah tha (Very Dense Forest) kan tih ang kha chu a tlem hle a, za ah pakhat (1%) pawh tlinglo, 0.74% chauh a ni.

Ramngaw tha pangngai anga chhiar theih (Moderately Dense Forest) hi 27.11% a awm bawk. Ramngaw tak taka chhiar tlak lem loh, Open Forest a tih mai hi a zau hle a, 56.68% zet a ni. Hemi anih avang hian Ramngaw (Forest Cover) hrim hrim chu nei zau mah ila a quality lamah kan sanglo hle tih a hriat theih.